اعداد ماخط القلم بالحروفي=ومايرسم الرسام في كل لوحه
يامرحبا بالي ليا قال يوفي=واليا ورد عد ً حباله تموحه
من عقل ماجت من لسان ٍ زهوفي=شاعر وراهي في المواجيب شوحه
مثايله غذت بساتين جوفي=وحطت لها مع دوحة الجوف دوحه
شاعر وشعره مثل ضرب السيوفي=لكن وين الهاجس الي يبوحه
يالحر الاشقر يامدما الكفوفي=اسمع كلام ً بين من وضوحه
ارسالتك ماحطها في الرفوفي=ابنيبها قصرا ً طوالا ً صروحه
قدمّت عذرك ياعشير الهنوفي=وقبلت معذارك بنفس ً نصوحه
اخوي اعرفك وانت رجل ً عروفي=والعرف يكفي ليش اطول شروحه
بدرا ً لعله مايجيه الخسوفي=الي يضيع عتمة الليل ضوحه
مشغول عنا مع كبار الخفوفي=مطيرات النوم سبة نزوحه
يرعابها البره ومتن الينوفي=ان قام عشبه وانعش الروح فوحه
ونبته تعاقب يم هاك الدفوفي=لين انمزج فيها الحلا والملوحه
عانه عن الاسواق نفسه عزوفي=يجعل والله عشقته ماتنوحه
وليا لفاه الظيف جاب الخروفي=عوق السمين ليا تثنى قروحه