منتديات شبكة قبيلة الغنانيم الرسمية

السلام علاكم وشلونكم
وبعد
واحدن من الربع يقول في يوم من الايام كانت عندي محاضرة
100 خاص عند دكتور ممل وشرحه يجيب النوم
قام الدكتور يتكلم عن الاختبار اللي يبي يكون
في الاسبوع الجاي والعلامه ( 18 من 20 درجتي )
المهم بما انهم ذكرو الاختبارات هزتني الذكرى
على الايام الخوالي اللي كنت فيها زاحف متوسطة الغزالي
وكان قدوتي في الزحف اسمه مدحدر بس امسكني
المهم في يوم من الايام كنت اتمشى مع ناس من الشباب
في شوارع الرياض وكان الرياض غريب ذاك اليوم
مافيه دوران ولافيه هجوله الناس نايمين بدري
قررنا نروح لبيوتنا وصلت للبيت
وكان ابوي عند الباب ( يالليل الليل من الشايب )
المهم قلت لشباب : خذو لفه لين الشايب ينام
جلسنا نص ساعه ندور والشايب عند الباب
وكان معه عصى مكنسه ( ناوي شر الشايب )
المهم نزلت في اخر الحارة ورحت للبيت على رجولي
وكان الشايب عند الباب
المهم قلت: يالليل الليل من اخواني الصغار
فاضحينا في الحاره ياابوي كل يوم مشكله
كل يوم مصيبه وش تبا فيهم واقف عند الباب
( مسوي انصح انا وخشتي )
المهم مادريت الا وعصى المكنسه فوق راسي
وانا انحاش داخل البيت واجلس ورى امي
قلت: تكفين ياامي فكيني من زوجك
شوي الا العجوز ماسكتني والشايب يضرب فيني
وانا جالس اصايح (ذكروني ايام الحانوتي وكين )
المهم والشايب يمسكني من رقبتي ويحذفني في المخزن
قلت: افا ياابوي وش فيك قلبت علي
قال: اختباراتك النهائيه بكره وانت جالس تصيع في الشوارع
( وش دراني عن الأختبار لي شهر غايب عن المدرسه )
قلت: لاتخاف ياابوي 30 من 30 إنشالله
والشايب يحذف علي كتاب إنقليزي
قال: ورنا وش تبا تسوي فيه
( يالليل الليل انقليزي مره وحده لاوالله صقطت )
جلست افكر وش اسوي الساعه 2 في الليل
والاختبار بعد اربع ساعات وانقليزي بعد
المهم طلع لي افكار في وقت صعب وجاتني معشعش
وقال: غش يالحبيب انت راعي الطويلات يالذيب
قلت: مالها الا براشيم بس ماعندي ورق
اكتب على سروالي صعبه لابس سروال رياضه
والباب مقفل ولااقدر اوصل للغرفه
جلست اقلب في الغرفه وحصلت سروال استرتش للخدامه السيرلانكيه
بس مشكله مااقدر اكتب عليها تبا تفضحني الخدامه
( كلام الناس كثير ممكن تطلع اشعه خبيثه )
جلست اقطع الصفحات المهمه والصقها على البجامه
طلع الفجر الإسترتش لابسه قلم معي قلم احتياطي موجود
خلاص الخطه ناجحه 100%
توكلت على الله وتوجهت للمدرسه دخلت القاعه
وكان موقعي اخر القاعه ( مكان مناسب للغش )
جلست وصلتني ورقة الاسئلة
جلست اناظر فيها على بالي اني جالس اقرا
المهم شديت الثوب على الإسترتش عشان اشوف وش تحته
ماوضح شي شديت الثوب اكثر ماطلع شي
( يالليل ام الغباء كله ياعم الشيخ )
كنت لابس ثوب اسود ( مافيه امل اشوف وش تحته )
حاولت اغش من اللي جنبي بس للاسف طلع مطوع
من اللي قدامي مع الاسف طلع غبي
من اللي وراي طلع غايب الغبي
قلت : مافيه الا إني ارفع الثوب بطريقة خفيه
دون مايلاحظني احد
المهم غشيت كل شي حتى اسمي كنت كاتبه في برشام
يوم انتهيت ورفعت راسي حصلت المدير واقف جنبي
قال: سلامات
قلت: الله يسلمك بس انتظر الباص
قال: ليش رافع ثوبك
قلت: اللي قدامي يقول غششني قلت له
مااقدر لو ارفع ثوبي شافني المدير
المهم وهو يرفع ثوبي وتطلع الفضايح وهو يسحبني
مع رقبتي ( قسم بالله احس إني عنز )
المهم دخلت المكتب وهو يقوم يضربني
وطلع وصك الباب علي ( ناوي شر المدير)
من حسب خبرتي في صياعة المدارس
اكتشفت انه يبي يفرض شخصيته على الطلاب
وذلك على حساب الزاحف الثاني في المدرسه
( خليفة المدحدر بس امسكني المهبول اللي هو انا )
المهم حاولت اتخذ إجراءت سريعه
انحاش مع الدريشه صعبه
بتاريخي في المدرسه اني انحاش مع دريشه
وليش عشان مدير ( هزئلت على اخر الزمان )
قررت اواجه الموقف بحزم وقررت ان اكل البراشيم
وان اخبي الإسترتش حق الخدامه تحت الكنب
بعد مرور ساعتين انفتح باب المكتب وسحبني المدير مع رقبتي
وكانت ساحة المدرسة مليانه بالطلاب واعضاء التدريس
وقفت امامهم والمدير جالس يتكلم من غشنا فليس منا
والغش والغش ...إلخ
المهم رفع المدير ثوبي وعينه في الطلاب ويتكلم
والمدرسه كلها تضحك
ناظر المدير فيني
كنت رافع يديني زي كابتن ماجد يوم يفوز على بسام
ناظر تحت حصل سيقاني السود يصفقها الهوا من كل جهه
سحبني للمكتب والطلاب كلهم يهتفون بااسمي
هذا هوا نمبر ون والمدير خلاص انجن
المهم دخلت للمكتب وصار المدير يضربني وانا انكر
وقفني برا عند المكتب وجاني قدوتي مدحدر بس امسكني مسكته بقعا
قال: يابعد كبيدتي والله يااليوم رفعت راس الطلاب
ابا انصحك بجملتين
1ـ جحيد سلاحك الوحيد
2ـ قل مدري تطلع بدري

قلت: مدحدر ذي شهادة افتخر فيها مالت علاك
( من يصدق مدحدر الزاحف بتاريخه ينصحني ويشجعني )
المهم دخلت على المرشد وجلست ابكي واقول مظلوم
رفعت الاوراق لوزارة التربية والتعليم ونقل المدير نقل تاديبي
وصرت استخدم زيت زيتون عشان اطلع البراشيم من بطني
وفي يوم من الايام تعبت ورحت للمستشفى عشان اتعالج
قالو نسوي لك غسيل معدة
قلت: اوكيه اهم شي السلامه والسلامه مكسب
حصلو في بطني برشام وباغه
وتجمعت اجهزة الامن في المستشفى
تجمعت وسائل الأعلام
( الفضيحه بجلاجل النهار ده يالهوي)
المهم اكتشفت أن الاغبياء حصلو تعبير عن هارون الرشيد
عندما قال من هارون الرشيد الى نقفور كلب الروم
والاغبياء يحسبونها مخطوطه تاريخيه
والان معروضه في باريس بقيمة مليار دولار
وانا ارفض البيع طمعاً بالزيادة
والمدير الغبي بعد 6 اشهر
طلعت ريحة غريبة في مكتبه السابق
ولما رفعو الكنب حصلو استرتش حرمه
ورفعت أوراق جديدة للوزارة بأن المدير السابق
شاذ ويستخدم ملابس نسائية داخليه
او انه يجيب الحريمات في مكتبه ويخنبق .

وسلامتكم وفمان الله يا حباني
واي سربوت لازم يعقل ويصير رجال مضبوط خربان مافيه:flex: