منتديات شبكة قبيلة الغنانيم الرسمية - الله من قلباً همومه كونّه

سلام عليكم ورحمة الله وبركاته أحب أن أقدم لكم هذه القصيده المرثيّه في طلق بن عوض بن مشلح الغنّامي { رحمه الله } قالها أخيه عايض بن عوض بن مشلح الغنّامي ..

الله من قلباً همومه كونه -- أونست في قلبي جديد المكاوي

البارحه ياناس جريّت ونه -- جريتها من قلب ماني بغاوي

أمراً فجعني ماتحملت اكنه -- والله يكافينا شرور البلاوي

ياعزوتي سود الليالي خذنه -- ويش اعتزيبه في نهار العزاوي

واسيفي اللي في المهمات اسنه -- قفت به الدنيا تجر الحداوي

عزي لمن سود الليال افجعنه -- سود الليالي مخلفات الهقاوي

كم غافل سود الليالي فجنه -- لو أمهلت فجعاتها بالحراوي

يقوله اللي مونسٍ حرهنه -- اصبر وانا للصبر ماني بقاوي

يا الله طلبتك كافنا شرهنه -- العفو والرحمة وانا بك رجاوي

مرحوم ياللي بالرجاجيل كنه -- نجمٍ يدل اللي عن الدرب غاوي

أمسٍ وانا وياه حنّه ورنه -- واليوم في لحلوح قبرٍ خلاوي

يا الله عسى ملفاه حورٍ بجنه -- واغفر ذنوبه يامجيب الدعاوي

ياغافرٍ زلات عبده بمنه -- يامنتهى الشكوى عليك الشكاوي

أفرج لمن قلبه على النار كنه -- أحس قلبي تقل يلويه لاوي

على الذي ماقط كشّر بسنه -- ولاهو مضريني بشين اللغاوي

وانا ادري ان الموت حقٍ وسنه -- الموت بين الناس سارح وضاوي

لكن عبرات الضمير هضمنه -- تشدي لعبرات الغريب الجلاوي

مسكين ماله والياً يستظنه -- الموت عنده والحياة متساوي

ياربنا طالبك عفو ومحنه -- استغفر الله عن جميع الخطاوي

على محمد هادي انسه وجنه -- صلوا عدد رش السحاب السماوي