منتديات شبكة قبيلة الغنانيم الرسمية

السلام عليكم ورحمه الله وبركاته :
كتب الشاعر غالب العتيبي هذه الأبيات يوادع فيها الطير:

ياطير عقبك ما نوينا الصقـاره
ياخير مجهمة الطيور ومغاتيـر
ياطير عقبك في فوادي حراره
وأحن للتشريق وأشتاق لعصير
أشتاق لاشرفت خشم الزبـاره
وأذكرك لا قالوا عبور المعاشير
ياطير لو بعتك برسم الخسـاره
ماهو ترى ياطير من قل تقدير
ياطير لك عندي مكان ووقـاره
والعذر يالقرناس واف التشابير
ما أنساك ياللي نادرٍ في طياره
إلا إن فيصل يعتزل نقلة الطير

وفيصل الذي ورد اسمه هنا هو الشيخ فيصل بن محمد بن عطيشان
وعندما سمع الشيخ فيصل هذه الأبيات وكان الناقل لها الأستاذ صالح الرشيد
رد على أبيات الشاعر غالب العتيبي فقال أبومحمد:

اللي ذكرنا فـي طـوارف عبـاره
كلمه وتكفي عـن كثيـر التعابيـر
الصاحب اللي مـا يونـي وجـاره
يفرح إلى جـوه النشامـا مساييـر
اللي بنـى القيفـان بنـي العمـاره
وأضفى عليها من خياله تصاويـر
وكلٍ يصيغ القـاف قـدر اقتـداره
أرج السموحه كان بالقاف تقصيـر
ياصالح بن رشيد يا ابـن النمـاره
بلـغ سلامـي للسنافـي وتقديـر
قلـه يصلـي ركعتيـن استخـاره
يالله عسى المولى يدله على خيـر
حنا سواة النجم لا اخلـف مـداره
قصدي إليا خلا الصقاره صقاقيـر
لا إناب تجـارٍ نعـرف التجـاره
حنا تجارتنـا الوجيـه المسافيـر
شروى لحاكـم يارجـال النعـاره
الـلـي يـزيــل التحـاسـيـر
كل أبلجٍ قطـع المسافـات كـاره
يصبر ولو طالت عليـه المشاويـر
يم خايعٍ راع الدبش مـا استثـاره
لازم نـزوره كـل عـامٍ بتكبيـر
ولابـد صاحبنـا يراجـع قـراره
لانسنس الغربي يسـوق التباشيـر
ويلقى العوض عندي لحوق وجساره
الوافي اللي ما تهجن مـع الجيـر

وبعد أن سمع الشاعر غالب العتيبي أبيات أبو محمد رد بقوله:

ياصالح بن رشيـد دوك البشـاره
جاني مرد طويق من راسي النير
والقاف في راسي تقادح شـراره
مهتاض لردود الوجيـه المسافيـر
بيوتٍ أحلى من حليـب الغضـاره
وأحلى من أوداق المزون الشخاتير
وأجزل من الجزلات نص وعباره
وأبلغ من اللي قال حسان وزهيـر
لا هنت ياللي مـا تغيـر مسـاره
يا أبو محمد ياعشيـر المناعيـر
وأنا تركت الطير غصب وغيـاره
بين العمل والخوف من هملة الطير
عفت العمل والبنـك ويـا الأداره
كني على الكرسي مثبت بتسميـر
والصافي اللي صطوته في شنـاره
ماعاد أنا وياه يا ابـن المشاهيـر
وخوة رياجـل الوفـا والجـداره
تلزم علينـا يازبـون المخاسيـر
نشري مخاوى كاسبين الصـداره
ونبيـع خـوة عابديـن الدنانيـر

ولكم اجمل التحايا