منتديات شبكة قبيلة الغنانيم الرسمية

يسعدني أن أنقل محاوره جمعت كلاً من

النجم الشاعر حمدان العصيمي و الشاعر زيد العضيله

حمدان العصيمي

هلا يامرحبا في حلة الترحيب والتوجيب
تراحيباً بعطر الكاد والريحـان مقرونـه
أنا راضي بحكم الله وأنا مومن بعلم الغيب
وعلم الغيب للي منتهى الأعجاب في كونه

زيد العضيله

يدوم الك البقى والطيب ورثه في رجال الطيب
أبادلك الوفـا وأقـول مثـل اللـي تقولونـه
الا ياصاحبي حمدان ماكل الضنـون تصيـب
ترى دنيـاك لـو ومّنتهـا ماهيـب مامونـه

حمدان العصيمي

نبى ناخذ ونعطي لين ساهرة النجوم تغيب
مدام أسرارنا بين الضلوع الحدب مدفونـه
والا يازيد كانك فاقداً فاطراف نجد ذهيـب
ذهيبك يالمطيري عنك حال الذيب من دونه

زيد العضيله

تبى تاخذ وتعطي مار من بعد الشباب تشيب
عيونك في عيون الناس والسكين مسنونـه
ذهيبي يالعصيمي في ذرا الله مايجيه الذيب
حراماً من حزامي يالعصيمـي ماتسرونـه

حمدان العصيمي

أخذنا حكمة الدنيا وأخذنـا فالدهـر تجريـب
وهاك الدرب يالأصحاب ياصعبـه وياهونـه
ليا حضر الدوا كبرت وهانت والجروح تطيب
ولن ضـاع الـدوا ماباقيـاً شيـأ تسوونـه

زيد العضيله

ياراع الخبله اللي شالت العقرب مع أم جنيب
ترانا نعرف أسمه كـان ماتقـدر تسمونـه
تحرّص يالعصيمي لاتخلّي للرجال دريـب
على قول النشاما كل حباّ جـوف ماعونـه

حمدان العصيمي

دخيلك يالمطيري لا تنوّخهـا مكـان الريـب
تبى تبحر سفينة نـوح والأرزاق مضمونـه
أنا عندي ذهب صافي وأنا عندي كلام صعيب
ياراع الددسن اللي في الصحاري عد طبلونه

زيد العضيله

أنا ودي أني أودبك ياللي تجهل التوديب
علشان الكلام اللي مجنـب ماتطرونـه
أنا ماقول فيك قصور وأنته ماتمر العيب
لكن المشكله وعلاً يدف الضلع بقرونـه

حمدان العصيمي

ولا يازيد مارضى ضحكتـك بسنونـك التركيـب
ترى سيـف العتيبـي مايهـاب الـراس ومتونـه
علومك لو نعددهـا يابـن سلمـي تشـق الجيـب
عسى يصفا الرطب دام الحشف في جوف عرجونه

زيد العضيله

أنا بضحك على كيفي ولاهمي شنب وشنيب
وخل السيف يبقى فـي جرابـه لاتسلونـه
علومي ياعصيمي مانقربها لشـك وريـب
وأبو طاعون عندي كيتاً ويطيب طاعونـه

ولكم خالص ودي وأحترامي