منتديات شبكة قبيلة الغنانيم الرسمية - أشهد أن فيه حريم أطيب من الريجيل

السلآلآم عليكم ورحمة الله وبركاتهـ

اول شي ابي منهو فيكم مايعرف الدخيل؟

سالفتنا اليوم سالفة من الماضي حصلت على عمران العدواني من البجايدة من العمارات من عنزة, والسالفة تقول انه كان لعمران ولد اسمه ساير والولد يطلع دايم يتفقد الحلال, ومرة صدفت انه فيه حنشولي يبي يسرق له شي من الحلال فشافه ساير وصار رمي بينهم واراد الله انه تصيب رصاصة ساير وتقتله , والله ويتورط الحنشولي لايقدر يهرب وهو بديار البجايدة فقام وهرب يم البيوت ويجي احد البيوت الكبيرة ويجدع نفسه وسط البيت وهويقول دخيل وبعض الخيالة يطردونه ويصدف ان البيت بيت عمران ابو القتيل فقال عمران للي يطردونه الرجال دخل قالوا ياعمران الرجل ذبح ولدك ساير, والله وينفجع عمران .الاولى ولده انذبح والثانية القاتل دخيل عليه.
والله شوي يستعيد عمران قوته ويرفع راسه ويقول الرجال دخيل وسايرمثل ساير الناس والله وتدخل زوجة عمران ام القتيل فخاف عمران ان المرة تذبح الدخيل وتصير سواد عند العرب يعني فشيلة يقال عمران ذبح دخيله ,ويقوم ويقف بينها وبين الدخيل قال وش عندك يامرة, وهي ساكته قال وش عندك يامرة يكررها ثلاث مرات وهي ساكتة وبعدين وهي تقول :-

الحمد للباري صدوق المخايل
= اللي بلاني بالليالي بلى ايوب

مايستوي لك يارفيع الحمايل
= ذبحت دخيل البيت عيب وعذروب

ادخل دخيل البيت لوكان عايل
= عفوعن المحرود حق وماجوب

تكسب بها ناموس بين القبايل
= وماراح يخلف والذي صار مكتوب

والطيب حبله بين الاجوادطايل
= ولايستوي طيب من الصبر مسلوب

مار خله دخيل ياذعار السلايل
= لوكان لابني مهجة القلب مطلوب