منتديات شبكة قبيلة الغنانيم الرسمية - الشاعر /فلاج بن عبدالله الغنامي والشاعر /مسعود بن سعد المقاطي

مراده بين الشاعرين العملاقين :

الشاعر الكبير القدير /فلاج بن عبدالله بن دخيل الله بن طايل بن نافه الغنامي العتيبي

والشاعر الكبير القدير /مسعود بن سعد المقاطي العتيبي

(شاعرين غنيين عن التعريف لهم بصمتهم الخاصه المعروفه دائما )

ويقول الشاعر فلاج بن عبدالله الغنامي :

　
ألا ياليل ياليل السعد والورد والريـــحان
ألا ياليل ياليل المحبة والهـــــوى الغالي

تلوحبك البروق من السحاب ويمطر الربان
تلج أبك الرعود من المحبة فيـــــك زلزالي

عرض لي صاحبي وأنا عليه من الغلا ولهان
ألا يامرحبا به لــو دمــــع العيــن همــــــــالي

الاسبحان خلاق الوجيه اسم الله الرحمان
كما نور البدر والرمش مثل الليل وظلالي

أبا أسعا في الجزيرة من بحر جدة الى عمان
تزود ابنا الخطاء للمرقب المجهول والعالي

أنا مالي وطن من دون خلي عاشة الاوطان
ومن بين النهود والشفايف ذاك منـــزالـــي

نهود كنـــها الـــتفاح مدري كنــها الرمـــان
بياضه مع حماره والطعم كالسكر الحالي

عليه من الجدايل مايغطي مفصل السيقان
يكفـــي عن عباته فوق راس المتن لامالـــي

يكفيـــني لحاف الى تلحفـته ونــا بردان
على صدره فراشي عن لهيب الشمس مقيالي

الى طالعت عينه كني الزراع والبستان
أطالع في عيونه جهتني مدري يورالي

عليها من سحر هاروت مايكفي بقتل إنسان
يعذبني بنظرات العيون الخرس عزالي

أنا لوني أشرب من شفاتك يانهر ظميان
ولو يبرا ظمايه مارويت ولاهدا بالــــي

غظيض العود مركوز النهد ولا البطن جوعان
لطيفا في المحيا والحواجب كنـــــها هلالي

وفيه من الحجارات الكريمة يشبه المرجان
ورا حمر الشفايف لاقصار ولابه طوالـــي

وهذه من وصايف صاحبي عن باقي النسوان
وباقيله وصايف مقــدر أذكرها للأجيــالي

وبكتبها وبرسلــــها ولانى ناســــي العنوان
على مايسر الله واســتلم ياطيــب الفالــي

وبسندها لمسعود العتيبي والعلوم أسمان
ومسعود العتيبي هو عريب الجد والخالي

رجالاً تخلي السروج المهار إبساحة الميدان
أذ صارت سيوف القوم منه القلب يهتالي

يقودون السرايا في نهار يجمع العتبـــان
مخضبت السيوف الى غدا للدم شلالــي

تسمع فالمعاني والمعــــاني صـــاغها الفنــــان
كما صوغ الذهب وأبغى الجنيه يصير بريالي

وانا والله ماسامح صاحبي عن رجت الميزان
يجيب المد وافي كل مكيـــال بمكيــــــالي

تخير في المعاني واحكم الدعوى على البرهان
ترى حبل الغرام يصير له عقدة وحلالي

وأنا مابيك لاتفزع ولاتفتح لـــــي البيبــــــان
مسكرتن جميع أبوابها عن كل خيـــالي

أبا رايك وأبا علمن يساعدني على النسيان
وأنا أقول المحبة مالها عاقل وجهالي

بلاي من الهنوف اللي نباها يروي العطشان
ولي قصة غرام ونصف عقلي معه ينشالي

بنا له فوق صدري خيمتن وضلوعي العمدان
وقلبي له مخده وله وسط القلب مدهالي

شبكني ماشبكته دون حبل الزود والنقصان
كما شبك الحرار مع الحمامة شبك وإحبالي

لوانه يشترى كان اشتريت ابغالي الاثمان
وثنيت الركايــب دونهـــا بقيــاد وعقـــــالي

وأنا مسلم وأعرف أن الخلايق والعباد إخوان
لاكن الى مشيت مع الطريق يحده جبالي

ولابه واحدن عالي يكون الله عضيم الشان
وكل النــاس فوق البسيطة مــار عمــالي

وعسى من حدني عنها يحدونه ورى القضبان
يحدونه رهينه لان يبلى جسمه البالــــــي
.................................................. .......
ورد الشاعر /مسعود سعد المقاطي

ولايالله طلبتك ياعزيز الجاه يامنان
طلبتك وأنت تعلم بالخفايا دق وجلالي

توكلنا على الله منزل ياسين والفرقان
وجاوبت الرفيق اللي رفع يمناه وومالي

هلا يامرحبا ترحيبة الصدقان بالصدقان
يقدمها صديق مايحب القــيل والقــالي

هلا بك مرحبا بك من بحر جدة ليا خيطان
عدد ماكبرت جمع الحجيج بيومها التالي

كريم ومن سلايل عزوة دايم كرام أيمان
عتيبه عزوتي نعم بهم في كل الاحوالي

أرحب بالكتاب وكاتبه من خاطر نشطان
كتاب يحتوي في داخله زينات الامثالي

كتاب فيه من غيد الفرايد والبيوت أثمان
ترانيم البيوت اللي ثمنها فالزمن غالي

بعد جتني قضيت ليل مانمته وأنا سهران
أدور لي بشكوى صاحبي مفزع ومدخالي

ولاكنك قفلـــت الباب قفل محكم بأمــان
حسب مايتضحلي شدها القاضي بالاقفالي

وخلاني سوات التايه اللي فالبحر غرقان
سوات الدلو يصفق من طرف جال على جالي

بغيت أفزع وألم الجيش وأهل الجاه والاعيان
مجــيه ألابمطلوبه يكــون الـــروح تنزالي

بغيت أرسل لبن مدهوس ونادي لبوسلطان
ودور مثل شرواهم رجال يجون فالحالي

وجهزلي ثمان اجموع رئيس وأربعه أعوان
ووزعهم على حسب الطلب رجلي وخيالي

يجيبون الخبر عن صاحبك والعلم مهما كان
رجال ماحداهم عن طلبهم كثر الاميالي

تبينا الحميــا فالمواقـــف والفعــــول تبــان
ليا جت ساعة غبراء عبوس وحربها صالي

نزف أرواحنا لصاحبنا فدوة على الاكفان
مواقفنا نسجلها بصدر البيرق العالــــــي

تحاول كتم جرحك يافلاج وعان جرحك بان
بعد ذاك الفرح والود صار الدمع همـــــالي

تصبر يافلاج ومن صبر يظفر بكل أحسان
تصبرلاتقول أقفى بروحي ظبي الاسهالي

يدورن الليالـــي والزمان بـــــدل الاحــزان
وتلقى فالزمن زول يــكذب كل الأزوالي

ترى مافيه مخلوق كمل زينه بلا نقصان
لو إنك قلت خلي عالي بالزين متعالي

تصبر لوجرحك من الهوى ماقد جرح راكان
وماصاب الدجيما من عذاب ألوان وأشكالي

غداء محد خذاء ثاره من اللي حسنها فتان
وصارت قصته مضرب مثل دايم وتنقالي

جروح في حشايه يافلاج أكبر من الصمان
على صدري ليا أمسى الليل قام إلها تجوالي

أنا لاقلت أبنسى الحب وأنسى الماضي اللي كان
عرض في خاطـــري فلم يذكـــرني بمدخالي

زمان أن الهواء جنه ومعشوق الغرام أجنان
أضحي في سبيله ماأتهاون لو فنى حالي

عبارات الغرام الصادقه عنوان كل لسان
مهو مجلس ظلال لاتعدى حزته زالي

جرى ذاك الهواء فالجسم مجرى الدم فالشريان
زماني كل ماقلت انتهى دوري توصـــــالي

مغير أصبر على جرح الزمن وأداره بالكتمان
أقول إن ماتقاضا في الهواء محدن تقاضلي

يجي وقت جديد يوفي الداين من الديــــان
وأنا صبري على جرحي عذاب لكل عذالي

شكيته يافلاج وذقت من جرح الغرام ألوان
وصار أول قضايا دنيتي بقفاي وقبــــالي

شكيت وقد شكى جرح الغرام إفلان وبن إفلان
شكى جرح الهوى قدامنا ماضين الافعالي

وترى ماكل شجرة يالعتيبي عودها ريـــان
ثمرها مايذاق ولاتحتها فـــي وظـــــلالي