منتديات شبكة قبيلة الغنانيم الرسمية - في شفاها جمرتينٍ صّرفتني ثم دعتني

احتوتني مثل جفنٍ يحتوي عين وخـذتني
بنت بدوٍ م تعدت نجد مشرقه ومغيبه

جت تبعثرني بفجر عيونها بس احتوتني
مثل م يجمع زجاج العطر نفحاته وطيبه

في نخيل أهدابها جيت اتفيا وازرعتني
وحصدت لي كل ظلٍ خصب وغصونٍ رطيبه

شعرها حفله وشمع نجومها يرقص بمتني
لا رحم ليلٍ تعرى حيل م غطى حبيبه

في شفاها جمرتينٍ صّرفتني ثم دعتني
يوم قال الثلج عيب يروح م حصّل نصيبه

والتفت ولاح خنجر جدها قلت : طعنتني
وأثرها من رمح بوح القاف فالخافق صويبه

ارقبتها علقتني في فضا العشق ونستني
م حلا النسيان من غيمه لريضانٍ خصيبه

قلت : كيف اوصدل نهايتها وهي تو ابتدتني
وقدمت تفاحتين بسلة الرحمه ضريبه

من سنابل كفها المورق بسرعه شرّهتني
كنها شيخٍ يحط بجيبك اللي وسط جيبه

من تظاميت بثغر معسولها حتى سقتني
كنت اقول : الله نكهة سكر الصحراء رهيبه

واعرف ان الخصر امير الجوع لو يشبع بفتني
م ترك سرجوفها الناحل نجايبه العريبه

م سألت الغيم هو يمشي كذا لين امطرتني
بالحنان اللي جفاف سنين م درّج شعيبه

واستحيت أسأل زوايا صمتها كيف عرفتني ؟
قلت : لازم صوتها البري يوديني واجيبه

قلت : وين القى القلوب المعشبه م جاوبتني
غير بالضحكه ودعوتها عليّه بالمصيبه

قلت : والله دعوتك غنوه وبالحيل اعجبتني
صافيه مثل الغدير العذب ممزوجه بريبه

قالت : ( أبك ) وطاح نصف السر من يوم اسألتني
وش ( تبا ) بالسر خل السر يبقى في قليبه ؟

قلت : أنا فدوة فرايد نجد لكن قاطعتني
ليش م قلت : ارتعاشة برق في مزنة عتيبه ؟

ليه م قلت بدوية جد والصحراء غزتني ؟
والمطر يغسل قلوب اهلي وتزهر منه طيبه

بي فصاحة نورسٍ بحري مواويله سرتني
بس نجد اللي رعى حبي شربت أحلى حليبه

قلت : والله عارفك ي بنت نبت ارضٍ ربتني
ابدويه ساسها في نجد مشرقه ومغيبه

رآقت لي