منتديات شبكة قبيلة الغنانيم الرسمية - الشكر لله ثم لأهل دعيكان

- منتدى الشعر والقصص الشعبية (https://www.gnanim.com/vb/forumdisplay.php?f=11)

- - الشكر لله ثم لأهل دعيكان (https://www.gnanim.com/vb/showthread.php?t=1416)

الشكر لله ثم لأهل دعيكان

قصيده رائعه
لكن لا أعرف من قائلها :
إن كان ابه من شكر يذكر وعرفان
يوم إن أبو وجهيـن بيّـن حفيلـه
يجي له الظميان ويـروح ظميـان
فوق الطوى والحوم طـاوٍ صميلـه
مايستحق الشكر هـاذاك الإنسـان
عبّـاد مالـه جعـل ربـي يزيلـه
الشكـر لله ثـم لأهـل دعيـكـان
أهـل البيـوت الدافيـات الظليلـه
شادوا منازلهـم بغاليـة الأثمـان
على المشاريـف الكبـار الطويلـه
واستخرجوا من سبّع الأرض باتقان
حلو العـدود الراهيـات الأصيلـه
ربعٍ لهم في قمـة المجـد عنـوان
هم مذخـرة غنّـام عـز القبيلـه
يستاهلون المدح ذربيـن الأيمـان
بعد خذوا فالعالـم أجـر وجميلـه
اوحوا حنين الذود والقيـظ حنّـان
وتواصوا ابكـل الصفـات النبيلـه
في سابق الهجره وفي تال الأزمان
والجيل الآخـر وارثٍ فعـل جيلـه
حصيلهم مابيـن حضـرٍ وبـدوان
مليون نعـم وهـي تراهـا قليلـه
قد حصّلوها غصب مافيه جحـدان
يوم الردي ماحصّـل ألاّ الفشيلـه
وألاّ هل الطـالات لوكـان ماكـان
من جاء مورادهـم حبالـه طويلـه
وهيه تهادر مثـل همّـال الأمـزان
إن كان فـي جـرداح وألاّ مسيلـه
وقامت تداحم فوقها صنع الألمـان
اللي يوطّ الهـوز واللـي يشيلـه
يصدّر الفاضي على طـول مليـان
مايطلبـه يلقـاه بأهـون وسيلـه
كلٍ ينـادي هـاك مطلبـك يافـلان
توكّلـوا بالطـيـب والله وكيـلـه
نادا لهم جزل العطا عالـي الشـان
وصدّق لهم راع العطايـا الجزيلـه
ماكنّهم فـي قاحلـة نجـد سكـان
تقـول فـي بغـداد نهـره ونيلـه
يالله ياللي تجزى الأحسان بأحسان
يامولـجٍ فاضـح نهـاره بليـلـه
تزيدهم مـن مـد جـودك يامنّـان
وتغدق لهم فضلك يارب الفضيلـه
واغفر لهم واجعل لهم كل ميـزان
يرجح من الحسنه بوزنـه ثقيلـه
هذا وصلى الله على نسل عدنـان
محمـد الهـادي نبـي الوسيلـه!

رد: الشكر لله ثم لأهل دعيكان

صح الله لسان القائل ولسانك اخوي غنامي

وبيض الله وجهك والقائل والله اني ناسي اسمه لاكنه بمنتدى المرقاب

تحيتي واحترامي

الله يبيض وجهه
وعلى مااعتتقد انه دوسري والله اعلم
احترامي لك ياناقل القصيده
قصيده تنومس القبيله
ولاهو غريب عليكم يالااد غنام الطيب

كل الشكر لك غنامي ونعم في اهل دعيكان

تحياتي وتقديري

القصيده جميله والاجمل منهاعزوتي تاج راسي الادغنام وسمعتهم العطره والغنانيم يستاهلون اكثرفدايمافعولهم تنومس في كل مكان وزمان تقبل مروري واحترامي

صح لسان قائلها وتسلم يمين ناقلها

والمفروض يبحث عن صاحبها حتى يعرف

حفظك الله بحفظه

صح السان قائلها وتسلم يمين ناقلها

مايستحق الشكر هـاذاك الإنسـان
عبّـاد مالـه جعـل ربـي يزيلـه
الشكـر لله ثـم لأهـل دعيـكـان
أهـل البيـوت الدافيـات الظليلـه
السالفة والقصيدة واسم صاحبها
سمعت بها قبل اعوام في مجلس خالي سحاب قبل وفاته رحمه الله
صاحب القصيدة ورد على موارد لقبيله من القبائل المجاوره للغنانيم وماني متأكد هم طلبو منه فلوس والا عيو يفرزون له وجاء عند اهل دعيكان
واستخرجوا من سبّع الأرض باتقان
حلو العـدود الراهيـات الأصيلـه
ربعٍ لهم في قمـة المجـد عنـوان
هم مذخـرة غنّـام عـز القبيلـه
يستاهلون المدح ذربيـن الأيمـان
بعد خذوا فالعالـم أجـر وجميلـه
اوحوا حنين الذود والقيـظ حنّـان
وتواصوا ابكـل الصفـات النبيلـه
ابي استفسر من الشيبان عن قائل القصيدة وأن شاء الله اجيب لكم اسمه وقبيلته

يالبّى قلبي يادعيكان وأهل دعيكان
الأخ غنامي شكراً على النقل
صح السان الشاعر
تقبل جل تقديري
واحترامي .