|
ديوان الشاعر /زعــــم الغنامي العطاوي العتيبي
اليوم أقدم لكم ديوان شاعر من كبــــار شعراء عتيبه وهو يتميز بجزالة وسبك وحبك القصيده وهو: الشاعر / زعم الغنامي الروقي العتيبي .. هب النسيم وجاوبه كـل عشـاق وكل ٍ علـى ماقيـل قلبـه يدلـه يااهل البخوت الطيبه بيض الأوراق لاتنفتـح قـدام فتـح السجـلـه احد ٍ يدورله مع الطيـب مـزراق واحد ٍ يدورله على النـاس زلـه اللي يبيع ويشتري وسط الأسواق مايـدري انـه زود الطيـن بلـه ياليتها عن درب الأدنيـن تنسـاق لو كان وقع سهمهـا فـي محلـه لو انها خلت على القلـب حّـراق واركت على عـرق الضمايرتتلـه لوتغضي عيون وعلي تابس ارياق لصفطلهم من صافي الكيـف دلـه ماجيت ابين مالجابي من اشـواق ولا جيت ادورلي على الناس خلـه ولا شاقني ماشاق غيري ومـالاق نفسـي عزيـزه بالوفـا مستقلـه يروقلـي درب ٍ سـوي ٍ ليـا راق واجنبـه لاشفـت باقصـاه علـه واشهركماحر ٍ شهر دون مسبـاق حـر ٍ نـداوي منسبـه مرتكلـه يقولهـا مـن ذاق منهـا ولاذاق شي ٍ يجي دونـه وشـي ٍ يزلـه قولوا لمن خايل من الغرب بـراق لا يحسبنـه بالخـبـر مـقـبلله العلم دونه علم واحجـاب ورواق على الطروس وبين ذيـك الأهلـه احد ٍ يغوص ولا وصل حد الأعماق واحد ٍ وصـل لاكـنّ عيـا يحلـه هذا الخبر للي لـه العلـم سبـاق اللـي يفسرهـا علـى كـل ملـه |
حبيـت اجـاري راعىالغنيّـه الزين نجدي والدلـع شرقـاوي واقول له ياهيـه لـثّ شويـه الزين روقي والحـلا برقـاوي بنات منهـم يحتمـون الهيـه ماهن بنات الطرش ولاالجـاوي الوحّـده فـي بيتهـا مخبيـه مصيونةٍ ماعرّضـت لمهـاوي الستـر والعفـه لهـا ماريـه والدين فيها والشرف متخـاوي من ساس قوم ٍ ينجضون الكيـه زبن الدخيل اللي يجيهم ضاوي الهم بحـد السيـف والهنديـه تاريـخ ماذيّـل بـذمـة راوي كم شيخ قوم ٍ جا يسوقه غيّـه خلوه ضيفة ذيب نجـد العـاوي يالي رميت الصيـده المرميـه صيدتك من حض النسر والواوي اخذ الكلام الـى ميـه فالميـه الزين روقي والحـلا برقـاوي |
على طارَ الصداقه والصديق الصـادق الكـذاب على طارَ الرفيق اللـي يفتّـل روس اشانيبـه على طارَ المعّزه والغـلا ومعاتـب الأصحـاب على طاري رجـال ٍ تتبـع النمـات والغيبـه تغَني يابنات الفكر مـادون الشعـور حجـاب مـدام ان الشعـر لـه هيبـةٍ ياحيهـا هيبـه ابا اسج القدم وارقى برجلي عالـي المرقـاب واعـدي راس مزمـومٍ تهيضنـي مراقيـبـه على ماقيل في سوق المعَرْفَـه بايـع وجـلاب ولابه رجل ماياخـذ دروسـه مـن تجاريبـه والا يالنايب اللي عن ملازيـم الرجـال تنـاب رجال ٍ والنعـم فاللازمـه ورجـال والخيبـه تسمّع يابن عمّ الذيـب يابـو منطـقٍ جـذاب واخذ لك في مهب الريـح تشريقـه وتغريبـه مضامين الكلام اللي تفكر بـه أولـو الألبـاب يمـرك وانـت ماميـزت مقصـوده وتركيبـه انا ماحارب الاجناب لجـل آراضـي الاقـراب ومن سرّح له مصيبه يبا يضوي لـه مصيبـه ترى سود النوايا اللي تخفّى في بياض النـاب تبيّـن فالرجـل فـي منطقـه والا فاساليبـه ليا منّا تواردنـا ووصلنـا صافـي المشـراب نعرف اللي على عد الرّوى تصفـي مشاريبـه يوردها على صـاف المـوارد مـورد الهيّـاب على الجـمّ القـراح اللـي بعيـداتٍ مجاذيبـه مدام المسك في جوف الظبي والسم جوف الداب الا ياكثـر ريجيـل ٍ مابيـن الشـك والريبـه ومكاذيب الرصاص اللي مشاريهه على الضرّاب يثوّر في مخـازن مـن يـودّ العلـم ويجيبـه |
مانيب شاعر بس اسوي قصيده مثلي مثل ناس ٍ تحـب الكتابـه إن جيت اسويلي قصيده جديـده تطلع بيوتـي كلبوهـا تشابـه الوجد واجد والمشاعـر فريـده وألد عيني في مقـص الرقابـه اشطب على بيت القصيده واعيده واصك باب الشعر وافـك بابـه سلام منـي يالحيـاة السعيـده تسليمة ٍ فيها زعل مـع دعابـه اما نعيمـه ذكـت امـا تفيـده واسعد عمر قلي يفنـد عتابـه مافيه مشكـل كلبونـا عبيـده بس الحصاني وش تبا بالذيابـه نرجع لمحورنا ووضع النشيـده كبوا سؤال اسعد مبالـه اجابـه قبل ثلاث ايام وسـط الجريـده اعلان لمسيـة ٍ ومعهـا نقابـه شعار من قوم الحيـاة الرغيـده يازين واحدهم ومحـلا شبابـه يشكون لوعات الزمان الشديـده ولاذاقوا من الوقت زرقت حرابه قلت الشكل ماهوب نظره بعيـده اهم شئ الشعر يكمـل نصابـه قربت انا التلفاز لاعـاد عيـده ابرمجه واحسب واضيع حسابه وبدوا حلال القوم كلـن وجيـده في درب محد ٍ قدمهم قد مشابه النجم يضحك والقمر طاح حيده والحر الاشقر قام ياكـل بنابـه الحب داخل في مجـال العقيـده وجد النبي حطوه ظمن الصحابه والمستمع دمه جمد في وريـده والناقد المنقـود وطـى ثيابـه اللجنه اللـي نظمـت مستفيـده ارزاق وشعيب ٍ ينونـي ذبابـه والا الشعر روح مراح الفقيـده اللى على قبـره تـرادم ترابـه بس الاكيـد ان المحبـه اكيـده لكن ماوصلت لمغـرم صبابـه العين سبـاري وقلبـي قعيـده وروابعي عنـي تقافـت ركابـه يابنت طول الصبر مانيب اجيده الود حـده قـام يأكـل نصابـه روحي على فالك وفرصة سعيده بكره يجي غير السحابه سحابه |
حبيبـي يازيـن عيونـه يازيـن عيونـه ولجونـه محدٍ لايمنـي فـي حبـه مجنون ٍ عاشـق مجونـه الـه خـشـمٍ انسيـابـي وبريطـم كبـر الليمونـه رقبته خمسه فـي خمسـه مزرهطتن فـوق متونـه واظهـاره لاروح يـبـري ايعرفونـه مـن قحنونـه لبسه دايـم لونـه بمبـه هـذا لبسـه دايـم لونـه ساكن في شقه مفروشـه واحد كيلـو مـن لعبونـه يدرس في محـو الاميـه ونيوتـن حافـظ قانونـه مـاودي اجيـب وصوفـه اخـاف العالـم يلقـونـه ياربـي تكفينـي شــره تكفينـي شكـه وضنونـه احبه وارخص لـه حالـي والغالي يرخص من دونـه يقهرنـي دايـم جـوالـه مشغـول ٍ مـع تيلفونـه رسم العلاقه فـي سلمـه يبغـا بطاقـه مشحونـه يغازل وانـا ساكـت لـه والعالـم دايـم يتلـونـه من سيـاره فـي سيـاره من لومينا فـي صابونـه يحسبنـي عنـه مــدري وانا خابر وش مضمونـه مصلحجي ومقطـع اربـع ويغنـي دلعـن دلعـونـه وانا اللـي غابنـي حبـه روحي في حبـه مفتونـه العـام انـا قـد اهديتـه قـارورة عطـر بكرتونـه واهديته من هجس شعوري ابيـاتٍ ماهـي موزونـه هي نسيتني وانـا صغّيـر واهيه كمـان صغيرونـه نجلـس سويـا ونتـابـع بشـار وهايـدي وفلونـه هي نسيت يوم نتهـاوش عند الخبز وعنـد التونـه وعقب اني كبرت شويـه سمعت عن اللي يطرونـه الحب اللي غربـل عنتـر قاسيت وغنيـت لحونـه ياربـعـي بالله قولـولـه عاشقهـا صفـر طبلونـه وهـاذي تـرا هالقصيـده معاناتـي مـع فتـونـه |
إرفـع مقـص النقـد والنـقـادي بادي ورى بـادي وليلـي بـادي في خاطري شي ٍ ولـدري وشهـو مستيسر ٍ فكري ونبـض فـوادي تقدح على هجسي بنـات افكـاري وخشم الفتيله شـب فيـه زنـادي الشحن جاري والهواجس تشحـن وسلك المشاعر بالشعـر منقـادي الذود ذودي والوسـوم وسومـي والسيف سيفي والشـداد شـدادي آرد على العد الرهـاوي ..راهـي ولااصـدّر الا خابـر ٍ مـيـرادي أضحك على المجنون قدم اضحك له وابكي على الماضي وورث اجدادي (ولـو أنـي أذا ناديـت حـيـآ) ولكـن لاحيـاه إلـمـن تـنـادي الوقـت غيّـر والزمـن متغـيـر والهجري عيـا يلحـق الميـلادي اقـرا عـن النسبيّـه وراعيـهـا واكتب عن اهل الدين والالحـادي أكبـر همومـي ماتعـدت كـمـي \واصغر همومي ذاعت مع الـرادي النـار حيـه والحيـايـا حـيـه والسم طعمه مثـل لونـه عـادي فليت في وسط البحـور إشراعـي وأرتعت من شوف المحيط الهـادي قلت الهوى والحـب مالـه خانـه لين ان خلـي حـط فـي قيـادي سـلام منـي يالحبيـب الغـالـي ياثالـث اعيـادي وكـل اعيـادي يالـي عليـك القلـب زاد خلاجـه والك المشاعـر جمرهـا وقـادي أرفق بحـال الـي نحيـل ٍ حالـه واترك كـلام الواشـي الحسـادي كم واحـد ٍ طـب الغـرام مكيّـم مثلـي وعـود مفلـس الايـادي كلـه مـن الـي ينقلـون النمـه اهل الكـذب والمذهـب المتحـادي وانته علـى ماقيـل قدمـك ديـم ٍ لابـد برقـه يسبـق الـرعـادي اما تتمـم فـي غرامـك وصلـك والا بلاشـي كلـمـة ٍ تنـعـادي |
صح لسان الشاعر الكبير / زعم ومشكور على الموضوع
|
صـــــح لــــسان زعم,,,
وتسلم ع النقل ياصقر روق |
والله اني اول مره ادري ان فيه غنامي
اسمه زعم !! مار ابيك تحط اسمه كامل ومن اي الغنانيم , وبعدين الله يـهديـــك يومنك كاتب الغنامي العطاوي الروقي العتيبي ليش ؟ اكتب لنا اسم العائله وخلاص الباقي خابرينه !! ومشكور وصح لسان زعم الغنامي |
صـــح لــــسانــــه ومــــــــــــــــــــــشكــور عـلى
الــنقــــل صــــقـرروق |
| +4. الساعة الآن 07:39 AM. |
Powered by vBulletin® Version 3.8.12 by vBS
Copyright ©2000 - 2025, vBulletin Solutions Inc.
جميع مايطرح في المنتدى لا يعبر بالضرورة عن رأي إدارة شبكة قبيلة الغنانيم الرسمية وإنما يعبر عن وجهة نظر كاتبه فقط