منتديات شبكة قبيلة الغنانيم الرسمية - لا تعتذر ارجوك.. مات الهوى !!

ما عاد باقي بالعمر كثر ما فات
ولا الذي باقي يعوض سنيني

قضيت عمري بين حسره وآهات
اضحك كذب والدمع حاير بعيني

يا عونة الله ما بقى شي ما مات
مات الوفا والود بينك وبيني

كنت احسبك بلسم دوا كل علات
وكنت احسب اوقاتي بقربك تزيني

اهديت لك عمري ولا قلت لك هات
قلت العمر يرخص لفرحة ضنيني

واثريك عاشق بس وقت المسرات
وبكل سهوله بعت شوقي وحنيني

اوهمتني بالحب على مر الاوقات
وانا على النيه وهبتك سنيني

رسمت حبك بالوفا ضمن لوحات
علقتها في داخل القلب فيني

واليوم اناظر لوحتي بعض مرات
اشوف فيها الغدر تو يبيني

كل شي اختلف فيها.. ملامح.. قياسات
بروازها الاصفر وبصمة ايديني

خليتني عايش مع الجرح بسكات
اداري الدمعه واقول ما نسيني

واثر الغلا والحب في داخلك مات
وانا الذي عايش على انك تبيني

واليوم وحدي ضايع (ن) وسط غابات
غابات غدرك للاسف يا ضنيني

اجر صوت (ن) يسمعه كل الاموات
وانته ولا فكرت لحظه تجيني

واليوم راجع تشتكي جرح وآهات
تريد تسكن وسط قلبي وعيني

لا تعتذر ارجوك.. مات الهوى مات
ما عاد به أي شي يربطك فيني