منتديات شبكة قبيلة الغنانيم الرسمية - تعدلوا ياهل القلوب المواليف

قيل أن فيه أثنين اخوان واحد مطوع وواحد قلبه خضر هواوي وراعي ولع وصيد

وله خاله مطرفها عن البلد شوي ولها بنت مزيونه وهويان هو على بنتها ويخدم خالته ومعتني فيها

وكلها عشان هالبنية هويان عليها على وضحى النقى على ماقيل ..

والمطوع رجال دين ولا يطلع من المسجد الا بعد صلاة العشاء
ولا جاء البيت ليااخوه الصغير مجهز له العشاء
وحدى الليالي يوم جوا الاخوان يتعشون قال المطوع لاخوه الصغير

يافلان انا طالبك مطلوب
قال الصغير تطلبني وانت اخوي واكبر مني ومطوع انت ماتطلب انت تامر امر
قال ابيك تمسك المسجد مكاني لين اجي
قاله وين تبي تروح ووش كثر تاخذ
قال انا ابي اروح لمكة وابي احج ومواعد لي ربع والوعد بكره نمشي ان الله قسم
ونبي نروح على بعارينا يبي لنا طريق شهر رايحين ونجلس بمكة شهر والرجعه شهر ....

قال الهواوي
ياخوي كيف امسك مكانك وانت خابرني راعي مقانيص وراعي ولع
واخدم خالتي ولا اقدر اوفق بينهن
قال المطوع

ياخوك انا طالبك ولا تنقطع هالمصلحة اللي تجينا
قال تدري امرح الليلة وبكره يصير خير يمكن اخوياك يجي لهم راي ولا يجون والا انت يبدي لك راي ولا تجي ..
ويوم صلوا الفجر اليا اخوياه مبركين ركايبهم وجاهزين للمشى
قام الامام بعد الصلاة
يالربع ياجماعة المسجد سامحوني وبايحوني انا حجاج
قالوا الله يستر عليك الله يستر عليك مير من اللي بيصلي بنا
قال اخوي فلان
وهم خابرين فلان هواوي وطراد صيد قالوا الله يستر عليك ويردك لنا سالم
الوكاد ان خوينا الهواوي مسك المسجد وقعد يصلي بهم يوم يومين ثلاث ايام كمل اسبوع
وقامت تنشد عنه بنت خالته وتسال امها
تقول وين فلان ماعاد له بينه لا يكون صاير له شي والا صادف له صادوف
قالت العجوز انا بروح انشد عنه
وهي تروح للديره وتنشد وين اليتمان يامن يعلمني عنهم يامن يخبرني عنهم
قالوا نبشرك اليتمان طيبين وامورهم زينه واحد حج والثاني يصلي بالجماعة
قالت اكيد فلان اللي حج قالوا لا والله المطوع اللي حج قالت اجل فلان يصلي بالجماعة

قالوا الله الله

قالت الله يهدي من يشاء من يهقى فلان يصير امام ..
راحت وعلمت بنتها
قالت البنت ماهقوتي ولا راح اصدق الا بعد ماااشوفه بعيني
وبالفعل وهي تروح البنت للديره وقت صلاة العصر وتصير حول المسجد لين جاء متأخر شوي الامام

وقال للمؤذن أقم وأقام المؤذن وتقدم بيصلي وهو يلتفت للجماعة
وقال استووا
ويوم جاء يلتفت بيقول اعتدلوا
ليا هذي البنت قدام باب المسجد

وهي تكشف عن وجهها عشان تبين له انها فلانه

وهو كان بيقول اعتدلوا وقال

تعدلـوا ياهـل القلـوب المواليـف
وصيروا ورى القراي خمسة صفوفي
احلف بربٍ حيـزم الغـرس بالليـف
مرجع بصر يعقوب بعـد الكفوفـي
انـك منـاي بلابسـات المشانـيـف
واللي كـذب يالله عسـى مايشوفـي
اللــــــــه أكبــــــر
وهو يكبربالصلاة ويصلي بهم
ويوم سلم والتفت للجماعة مستحي من الشيبان

والا ولد عمه وراه قال فلان قال سم قال والله لك اسبوع مامثل صلاتك
مير هاليوم دخلت حديث بين الاقامة وتكبيرة الاحرام
انا طالبك الا تعيده ...

قال لا لا يافلان هذا حديث اسناده ضعيف ضعيف جدا مايعاد واعفني منه