منتديات شبكة قبيلة الغنانيم الرسمية

السلام عليكم ورحمه الله وبركاته
هذه القصيده للشاعر ذعاف بن سهل الحبردي الملقب(بالسيل)

يامال تكفا شب ضو المعاميل ** يانسل ابوي وعز من هو عدابه

يمكن يغير جونا ريحة الهيل ** فالصدر هاجوسً وهمه غدابه

طارن علي العب وأغني تماثيل ** مادام هاجوسي يفتش زهابه

شل عني الطاروق وألعب مواويل** والقاف سره دام همي سرابه

أسمع هجاريسه ليا عسعس الليل ** قافً طرا من قول حضرة جنابه

يقول أنا مجنون شفت التهاويل ** مدري علامه هن ضيع صوابه

مجنون والله يوم أصيح لمهابيل ** وبكره قليل العرف يقرا كتابه

قله ترى ياهن نوفي المعاديل ** ثم أنشده ياهن وين النجابه

قل هيه ياللي ماتعرف الرياجيل ** أسمع من المجنون حمضة جوابه

كلش يهون ولا الثلاث الغرابيل ** الجهل والحاجه وحرب القرابه

ردوه عني قولو يقوله السيل ** فيهن يضيع مع الوقار المهابه

وثنتين فيهن عز عند المشاكيل ** العزم والايمان في ماسعابه

للحظ فيهن والوناسه مداهيل ** والوقت فيهن مايكشر بنابه

وفرقا هل النمات والقال والقيل ** فيهن عن الاوجاع كل الطبابه

وبعض الرجال أرخوم خم ودعابيل ** ثوب وأسم رجال تكسي زلابه

وبعض الرجال رجال مثل الزرابيل ** توطا ولاعنها غناه ومثابه

وبعض الرجال رجال مثل الخلاخيل ** ديكور في رجلين من هو مشابه

وبعض الرجال رجال مال وعماميل ** همه من الدنيا يعبي جرابه

وبعض الرجال زحول ولحملها تشيل ** ومع حملها شالت حمول الغلابه

خطو الرجال اللي تسما حلاحيل ** كل مايزيد الحمل زادو صلابه