|
براءة ذمة
.
. بسم الله الرحمن الرحيم يا اخواني موضوعي عادي جدا وطبيعي جدا وظاهرة متكرر معي انا بالذات من مايقارب خمس سنوات او اكثر ماكنت ناوي والله افتح هالسيرة خاصة في هالمنتدى الغالي لكن ماوجدته اخيرا خلاني اكتب هالموضوع ،، يمكن فيه منكم ناس تعرضوا للسطوا العلني كما تعرضت انا ،، وفيه اخ الله يجزاه خير ،،كان يكتب باسمي وينشر قصايدي الحقيقية ويشارك في منتديات عديدة والحقيقة كان يكتب القصايد بدون اي زيادة او نقصان وانا اقول هذا يمكن يبي المصلحة لي لكن ما استاذن ولو استاذني كان على الاقل حطني في الصورة،، في الاول كنت اسجل وراه في كل منتدى واتفهاهم مع الموقع وينتهى الموضوع لكن بعدين تعبت بصراحة ،، قلت مادامنه مايسيء لي بخليه ،، مع قناعتي ان مالدي ماهو مغري لهالدرجة ،، امس طحت على موقع مدونات وفيه وحدة الله يهديها ناقلت قصيدة سبق ونشرتها هنا بسم بشتاق لك ،، المشكلة محرفتها وموجهة الكلام على اساس ان المخطاب ذكر ومكسرة الابيات ،، اليوم طحت على واحد ناقلها بحذافيرة وموقع باسم اليتيم واللي قهرني يقول بقلمي ،، شوفو الرابط ،، http://www.k1br.com/vb/showthread.php?p=44662 رحت وسجلت في نفس المنتدى واظن اني استعجلت ،، لكن زبدة الموضوع انا بريء من اي موقع مسيء للاخلاق او اي رد من عضو يحمل نفس اسمي ،، سواء في المنتديات او الفيس بوك ،، عليه جرى التنويه وتبرئة الذمة ،، لكم كل الشكر ،، سلطان مطلق الغنّامي كاتب بريء وبسيط لايسيء لاحد ولايبي من احد اي شيء ويحاول يتخلص من مايسيء لسمعته بكل بساطه لانه لايملك في هذه الدنيا غيرها ،،، .. |
مرحبا يابوديما
لا يسلم أي مبدع من هذه الممارسات وتطمن من يعرف سلطان وشخصية سلطا يجزم بأنه لا ينزلق في أمور غير محمودة اجمل تحية |
.
. شكرا يا ابن نما وصراحة انت ممن استشهد بهم ان صار شي ولا شي بس خلك قريب ( : لك وافر الشكر يا عبد العزيز واشكرك على حسن ظنك لك محبتي اخوك : سلطان .. |
يا دافع البلا .. !!
هالحين الناس هذولي وش قصتهم ..!! ودي أعرف بماذا يشعروون ؟؟!! السرقات يا سلطان وانا اخوك واجد بالحييل .. ! لعل أولها سرقة قصيده موهق بن عجاج المشهوره ( هبت هبوب الشمال وبردها شيني ) وايضا سرقة قصيدة دخيل الله الدجيما ( يا جر قلبي جر لدنا الغصوني ) والكثييييير الكثيييييير وانت تبقى شآعر ومعروف طرقه واسلوبه ونطلع قصيدتك من بين الف قصيده ... :) لكن ما علاك منهم يا سلطان و ســر لا كبــا بكــ الفرس .. |
.
. الغالي نواف انا ماقصدي الا انه يساء لي وانا مدري وتعرف النت فضاء واسع فيه الزين وفيه الشين ،، شاكر لمرورك لاعدمتك يا ابو عيد تحياتي لك اخوك: سلطان .. |
الله من النقص الي يحسون به نعنبو بليسهم ماهم شعار وبيصيرون شعار غصب ؟؟ قلت العقل مصيبه مار ماعليك الي ما يجي في الدنيا يجي في الاخره والله اني بغيت اسجل في المنتدى واسفل فيه بس فكرت وقلت وش نلحق وش نخلي ؟؟!! السرق راح شيء يسري في دماء الحثالات من الجنسين الله يهديهم ويردلهم رداً جميلا
احترامي لك يابو ديما |
.
. واحرامي الشديد لعقليتك يا سمو الذات وانا صراحة كنت متردد في طرح مثل هالموضوع فيه ناس يمكن ماهيهمه هالامر وشي طبيعي لكن ماتدري وش يصير في المنتدى باسمك يمكن يسوى علاقات وحركات ويذي بنات خلق الله والاسم في الاول والاخير حساس مهما يكون ،، الخوف من زرية العقال ولا اللي غيرهم ماجا ولا راح في كل الاحوال ،، تحياتي وتقديري لتفاعلك اخوك : سلطان .. |
سلطان اولآ بيض الله وجهك في فضح السروق وعلى موقعه الذي يتباها فيه امام المعجبات والمعجبين
اخي لو وضعنا بيت واحد من اشعار سلطان مطلق في قصيده من خمسون بيت لأضاء كا النجمه وميزه الجميع فما بالك بقصيده كامله لااعرف كيف لايخجل أي شخص ان ينسب لنفسه قصيده او مقال او اي شيء من هذا القبيل ويتباها به ويفتخر الا يستحي من نفسه اولآ ومن ثم من الاخرين انه والله منتهى الوقاحه والسذاجه ومنتهى العجز الفكري اخي سلطان كل شيء يمكن التغاضي عنه الا عصارة الافكار فلو سرقة لك نقود او اي من المقتنيات فهناك مجال للتغاضي عنها اما قصيده او مقال اولوحه تشكيليه فهذا لا يمكن السكوت عليه او المجامله لآنها غير مبرره فما هو الأمر الملح لسرقة مثل ذلك اخي لدي اقتراح وهو توثق جميع ما انتجته مخيلتك من الادبيات وتسجيلها بحيث لا يستطيع المتطفلون التجرء على سرقتها ونسبها لهم تقبل احترامي وتقديري وحبي حفظك الله |
صراحه هذا الشخص الذي اقدم على هذا الفعل الدنيء لديه مرض في عقله وفي شخصيته المهزوزه وانا اشوف انه مخطي بفعلته والمفروض يستأذن فهو ليس عيب ان يستأذن وانت يابو ديما الله يعينك ونحن نشد على يدك للصد لهولاء المتطفلين وقليلين الحيا
ونقول لهم هداكم الله فالشخص الذي لايبدع بنفسه لايحاول ان يتصنع الابداع من مخيلة غيره فهذا قمة التخلف والضعافه |
حسبنا الله على مثل هؤلاء يجب ان لاتسكت على مثل هذه الممارسات ولاتعطيهم مجال اخوي سلطان
بالتوفيق ان شاء الله |
السلام عليكم
مساء الخير هذ قلت حيا ولا ينسكت لهم ون كانو هنا فضحهم الله يفضحهم عصارت مخك واحاسيسك ويلقاها بارده مبرده والمفروض ان اي بيت ينزله شاعر ويكون البيت الغيره يشير اليه ويكون اقتباس وتبي الحقيقه الي يسرق مسيكين ومستغبن الناس ولاله الا الطرد والتفضيح يالبوه من منتدى تحس بالنعومه من تخش ردود ناعمه ( انا بسجل فيه ) ابي اتنعم وشوف النعومه ماعندي الا حصى كشب الله يعينك تحياتي لك |
.
. الغالي ابو رامي ،، والله ماتدري وش كثر عديت وخليت لناس من البدة يانياف شي افكار شي ابيات كاملة شي مادري وش هو ،، لكن ماهي مشكلة المشكلة يانياف التدخل من الناس باسمك وم ثم بناء علاقات قد تسيء لك في مابعد ،، بعض المنتديات يكون المجال فيه مفتوح لتكوين علاقات سيئة يابو رامي ،، وانا جربت وعرفت اكثر من ماتتوقع ،، خاصة لما يكون الواحد يكتب شعر وكلام من هالشي يشوف العجب ورب البيت ،، وحلو تطرقك للفنانين التشكلين هم اكثر من يتعرض للسرقة في وضح النهار وعلى اعين الملأ ،، والتجارب كثيرة ،، تشرفت بك يا قلب لك كل الود والحب اخوك :سلطان .. |
.
. الغالي العبرود بس الواحد طفش من كثر المطامر في المنتديات والمواقع ومهما حاول ماهوب قادر يحصي ،، لكن احسن شي الواحد يركز له على كم منتدى ويمسك ارضه ،، (: لك كل الحب والشكر لمرورك الغالي تحياتي اخوك : سلطان .. |
.
. الغالي عبد الرحمن من سيئات الانترنت انه مايقدر يحفظ اي حقوق لاي شخص ،، شكرا لمرورك الغالي ياغالي وكل التقدير لك اخوك : سلطان .. |
.
. . جتني رسايل من اصحاب الموقع ويعتذرون قلت مالكم ذنب الذنب للجاني وفعلا يستغبي الناس والله انك صادق خاصة اصحاب الموقع اللي هو فيه وهم فعلا ياشباب ودهم بالظهور او محرومين من الموهبة ويبون يصيرون موهوبين غصب ،، مادروا ان الشعر يلحس مخ راعيه وعمر راعية الافتراضي بالكثير اربعين سنة ،، بعد مشيئة الله طبعا ،، ابو ثامر الله يقطع ابليسك ابك كيف حصى كشب ههههههههههههه تعال تراني سجلت هناك يمكن اصير مشرف واخليك تفلها هههههههههههههههههههههههههههههه اسعدني والله مرورك يا معدي تحياتي لك ياغالي اخوك : سلطان .. .. |
أبو ديما انا والله مفتكر في الأقزام هذولا ؟ ياخوي بما إنك ماتكتب الشعر ليه تسرق إبداع الناس وتنسبه لك ؟ يعني تكذب على نفسك اولاً وتكذب على الناس ! بينما لو قال قصيده أعجبتني للشاعر سلطان الغنامي ونزلها افضل من انه يحرج عمره الحين والله ان كأني اعاين فيه وجهه صغران كبر العجمه لكن يابو ديما ستظل الضلع اللي مايآصلك احد ولايهزك ريح يابن مطلق إرق سنود ولا عليك من الأقزام
|
.
. عوض احس انك يا ابو طلق خاش مضاربه والله العظيم :o قشعر جلدي وعصبت راسي يا سنايدي بس مافيه شي كل من نطاردهم انا وياك من سنين سراب واقلام تكتب ولايعلم بسرها الا الله عز وجلّ ،، الله لايحطنا في مثل هالموقف وانا ورب البيت ماودي ان اي مخلوق يصير في هالموقف لكن مثل ماقلت للمرة العاشرة ،، المقصد هو مايدور في الخفاء ،،والا الجهار ابي اعرفه بكك تاكيد،، انت وراك مامريتني خل التصريف ،، تكلمني جنب البيت وتعداني !! :flex: حبي لك يا بو طلق هنا وفي كل مكان وزمان اخوك : سلطانوووف باشا :mad: .. |
اخوي سلطان الي صار يدل على نجاحك وروعة قصائدك..
يكفي انك سلطان مطلق عوض الغنامي.. |
ابوديما يسعد مساءك بكل خير اثرها خربت مالقا الى يسرق قصيدك تصدق مسكين ومريض ياابوديما كتابتك صعب احد يكتب مثلها انت وسعد علوش ونايف صقر احس دربكم واحد ومن المجددين للشعرويكتب وينسبها اله صراحه شي وانت ياابوديما تعرف ياابوديما هاذ مسكين وقصايدك معروفه وموثقه ولايهمونك تبانا نداهم المنتدى داهمناه عاد كنت ابي اسرق قصيده غاده هههههههههههههههه واثرك تبى تكفشني لان مشكلتي صريح اعترف على طول ابوديما ابي منك طلب انك تنزل ديوان صوتي واسف على الاطاله يافيلسوف
|
.
. اختي الحنونة نجاحي انا وغيري بتوفيق من الله ثم بوجود قلوبكم البيضاء منارات نهتدى بها ،، واغصان نتفيأ ظلها،، نحن بدونكم ابناء عمومتنا رجال ونساء لاقيمة لما نقدم ،، تحايا طيبة يا اختي لك الاحترام اخوك: سلطان .. |
.
. الغالي فيصل ابو بطين وانا اشوفك مغيرن الصورة تبي تموه علي ،، ههههههههههههههههههههههه لكن حلالك انا والقصيد ولايهمك ،، تستاهل والله ،، بس لاتجي تعلم على نفسك هههههههههههههه اهم شي يا ابن العم ان الواحد يبريء ذمته والباقي ملحوق عليه ،، وفكرة الديوان الصوتي ماتفي بالغرض يعني كم يسجل الواحد عشر عشرين قصيدة والباقيات وين يروحون مالهن والي ،، !! لاعدمت تواصلك وتثقتك الغالية ومساواتك لي بنايف صقر شرف ووسام لان نايف صقر بكل أمانة والحق يقال هرم من اهرام الشعر الخليجي وشهادتي فيه مجروحة ،، ولايهون ابو علوش ،، كلي حب وشكر لك اخوك : سلطان .. |
ابوديما الغالي الديوان الصوتي شي لابد منه مار اختصرها واخلص نبى نشتغل فيه تراني فاضي الايام ذي وابشر بسعدك واناتراني ازعاج ياابوديما وشكرا على رقي اخلاقك يالغالي ابوديما
|
.
. كيف نشتغل فيه ،، اجل هو يوظف !! << ------ يصرف انت ابوها وسمها انا ما أعرف غير هالقصيد والفنيات والله ما اديرها يافيصل ،، ابا ادور لي مدير اعمال براتب مقطوع واستشيره وش رايك :o تحايا صباحية اخوك : سلطان .. |
ابوديما انامدير اعمالك وبدون اي مقابل مار الي يعينك والله من الطعات عند اخوك احينا ابرمج خطا وفي عجله مار الديوان منزلينه منزلينه الله لايعوق بشر وانا الي معارف في الامور ذي ابشوفهم ونبى ننجزه
|
.
. الطعات عندي وعندك خير ههههههههههههههه شف شف معارفك وعلمني ،،، وترى الراتب من اليوم محسوب بالهلله بس رجع الصورة الاولة عشان اعرفك لامرتني ولاشيء (: صباحك فل يا ابو سطام تحياتي اخوك : سلطان .. |
أبو ديما والله فكره يجب أن يُشاد بها ونشكر فيصل ابو بطين عليها الا وهي الديوان الصوتي يجب أن تؤخذ بعين الإعتبار
|
جابها ابوسطام بس اسمع كلامه يابو ديما ونزل الديوان الصوتي وانا ابغا اكون من المنشدين في الديوان ولو ان صوتي ابح بس يصلح لقصايد الغزل
|
سلطان انت شاعر نجم
ونشر لك في الجرايد والكل يعرف مقدرتك الشعريه وبالنسبه للي يسرق القصايد ويحرف فيها ويكسرها هذا قليل ادب ولو تبي تتبع وراهم راح تتعب بس مدامك ناشر القصيده قبله ماعليك منه لان النت الحين يحفظ القصيد وكل شئ مثيبت بوقت وتاريخ |
السلام عليكم
اللي أختشو ماتو على قول المصاريه ههههه الحمدلله على نعمة العقل والله ان لي رأي شخصي في هولاء أشبههم فيه بما لايليق ذكره هنا..... مره لفيت وحده من قصيداتي بأسم واحداً .........والله أني نسيت أسمه مقطوع الطاري ....... لا ويقول تفظلوا حياكم الله على جديدي .....ابك تسيف جديدك ياعديم الأمانه يامنحط ياميت الضمير !! .......ومره لقيت << خل التتسذب هي مغير مره وحده اللي سرقوك ..ايه صح ماغار مره :) عموماً مدري وش الحل مع هالنوعيه البايزه صراحه واللي محيرني هم وش يستفيدون .؟! لكن دور اللص وعلمنا عشان نشرشحه ونخلي فضيحته بفلافل <<ما أفطرت:( ترى الغنانيم مايسرقون القصايد منول وهالحين جاين فيهم جند يروعون القلب لاحيا ولامخافه من الله وأعرف لك رجال عمره فوق الخمسين حرامي قصايد لكنه أبله وأغبى منه مافيه لأنه ما (يستهمي) غار من عيون القصائد وفرائد القلائد وأظنه مريض نفسي الله يشفيه مدري وش علته يوم أنه أبتلى بالسرق وراه مايخرج للعراق والا للأردن ويسرق منهم يمكن نقدر نمشيها له على أنها كسب وماهي بسرقه :) مار عانه ماغار يدير عيد بن حطاب العضياني ولافي أبن حمود الغيداني مورسن في هالثنين توريس تخصص بس لامن أعجبته قصيده لغارهم لطشها وماعليه هي منشوره في ديوان والا ملقيها الشاعر في أمسيه على التلفزيون والا .........أبد الوضع فري ..الله يشفيه ويعافينا من ما أبتلاه به.........أقول يجب فضحهم وعدم مراعاة المشاعر في هذا الشأن لان هذا تعدي على حقوق الغير وقلة أدب وبجاحه مابعدها ....... سلطان لاتألو جهداً في توثيق قصائدك من هالحين أبدأ في أختيار موقع تكتب فيه بأسمك الصريح وأنصحك بأبيات دوت كوم كانهم على خبري أو منتدانا هذا.. وخصه دائماً بجديدك لأن تاريخ النشر مهم في أثبات حقك .ولو حصل ووجدت أحد سارق من قصائدك شيء تقدر تحتج عليه بأنك نشرتها قبله وبأسمك الصريح وهذا ماعليه نظام وزارة الأعلام عندنا في أثبات ملكية الحقوق الأدبيه ويرعاك الله ويحفظك الله وسيكفيكهم أنه على كل شي حفيظ |
ابو ديما الحلال السائب يعلم الناس السرقة منثرٍ حلالك في كل وادي وتبغيى الناس يحافظون لك عليه والله الظاهر اني ابي أسرق من قصايدك اذا الدعوا سرق انا اولى من غيري وهذه الايام في حاجة الجديد ههههههههههه تقبل تحياتي والله يعينك على المطارده حتى تتعب
|
ابو ديمه
يامرحبا يامرحبا السرق واجد وانا اخوك بس ان الدعوا توصل انه يستغل اسمك وشهرتك ويسوي علاقات هاذي جديده اسمع يابعد تسبدي مالك الا توثق كل قصايدك في ديوان صوتي وبعدين اذا هو سرقها من منتدا ماعليك لان التاريخ يحفظ لك حقوقك بس عندي سوال اذا سالته قلت ليش تسرقها وش رده ؟ |
ياسلطان ماحد سلم من ها الخبول الي يحسبون الشعر اسرق وانشر وبس مايدرون ان الشعر اكبر من هالكلام
انا ممن تعرضت قصايدي لسرق ويمكن اكثر الي في المنتدى يدرون عن الشي هذا ومافيه احد ينشر قصايده فالنت الا حصل له ها الشي |
ياما غدا للحاج من جمل
عينت قصيدة الضامي صديقي المفضل :d الذي ترونه متربع امامكم لاتستغرب يابو ديمه سرقة الافكار والابداع والقصيد صار عاده عند اكثر الناس عسى الله يسلط علاهم وانت معروف عندنا وعند غيرنا وسمعتك نزيهه وشريفه مهما حاولو هؤلاء الشرذمه بتشويه ماقدمت وانا ابا اسجل في منتداهم مع معدي واكتب من قصيدك وقصيد بعض الربع اللي مهملينه :d ودمت بود |
.
. ربك يسهل يا ابو طلق واعتقد البارح شرحت الموضوع جملة وتفصيلاً شاكر لك مرورك تحياتي أخوك : سلطان .. |
.
. ههههههههههههههههههههههههههههه العبرود احلى صوت واسعد فرصة الصوت الابح احسن شي لقصائد العزل ابشرك ،، ويشرفني تحياتي العطرة لك اخوك : سلطان .. |
.
. . الغالي ضيف الله ،، بارك الله في الموضوع اللي خلاك تمرّ ،، بالنسبة للجرائد معك حق يمكن تكون مجال حفظ لكن الهدف والله يا ضيف الله اضاءة هذه المشكلة وطرح وجهة نظري من خلالها والاخوان ماقصروا كل ادلى بدلوة ،، وجميع ارائهم ورأيك كذلك محل اهتمام ان شاء الله شكرا لك ولمرورك الغالي اخوك : سلطان .. |
.
. الغالي سند ،، والله انك فضحت هالشايب ونكبته بس انصحه ياخي قله سنك لايؤهلك الى ان تتصابا على حساب غيرك ،،وبعدين المثل يقول لاسرق اسرق جمل ماله حيلة في عيد ولافي (: ،، انا والله ياسند اكتب باسمي الصريح ومن قديم بعد ،، لكن فكرة الموقع الخاص او المدونة جميلة وابيات كوم لي فيه كم قصيدة ،، وان شاء الله اكمل الباقي ،، بس ياسند انا احس اني كبرت الموضوع نوعا ما ،، وفيه فكرة تراودني اللي هي استخراج فسح نشر بس يعلونك الوزارة تروح وتجي لين تدوخ ماطلعته دراسة وتنقيح ومادري ايش ! ! صراحة ماجربت بس اسمع هالمعاناة من ناس مقربين ،، لك حبي وتقديري يا ابو عبيد اخوك : سلطان .. |
.
. مرحبا يا ابو تركي ،، ابو تركي والله مانثرت حلالي يا ابن الحلال انا كلها ثلاث منتديات اللي حاشرن نفسي فيها ماطلع لو انه شبر :icon1366: ماشاء الله عليك انت عرفت لها ونزلت ديوان صوتي ،، والحقيقة نال رواج في المواقع ،، وترى فيه ايضا قصائد قريتها في كم موقع مذيلة باسمك يا ابو تركي يعني تطمن انا اللي ابطب في ديوانك وانقي وانشرها باسمي واحلف ان اسمي سلطان الغنامي :shiny01: تحياتي وحبي الشديد لك اخوك : سلطان .. |
.
. الغالي طلال ارحب حياك الله ،، اي شهرة الله يسمع منك :shiny01: ذكرني سوالك في اخر الموضوع بموقف مرة مع واحد لقيته في احد المنتديات ،، سجلت في المنتدى وارسلت له رسالة خاصة قلت وراك تسرقني قال : بماذا تهذي انت ايها المجنون يعني يقلد ردودي في بعض الاحيان :sad_1: طنشني وعلمت عليها الادارة بس ماقصروا شاتوه :mad: فيه ياطلال بعض المنتديات مثل شظايا تمنع خاصية النسخ للزوار ودي لو المنتدى عندنا هنا يطبقونها بيكون فيها نوع من الخصوصية للمنتدى واعضاءه ،، تحياتي وشكري لمشاركتك الغالية اخوك : سلطان .. |
.
. الغالي الضامي ،، شرفت الموضوع ،، بس وش رايك في الشعور بالله يجي الواحد يتفرج في موضوع او قصيدة له ماتقهر ! لكن على قولك النت عالم واسع ومن يدخله يتحمل تبعات دخوله على كل حال ،، شكرا لمرورك الغالي يا الضامي تحياتي لك اخوك : سلطان .. |
| +4. الساعة الآن 12:24 AM. |
Powered by vBulletin® Version 3.8.12 by vBS
Copyright ©2000 - 2025, vBulletin Solutions Inc.
جميع مايطرح في المنتدى لا يعبر بالضرورة عن رأي إدارة شبكة قبيلة الغنانيم الرسمية وإنما يعبر عن وجهة نظر كاتبه فقط