|
فرحتلك وانا معاليقي حطام (مشعان البرّاق)
فرحت لك .. وأنا معاليقي حطام
والصدر .. من ما فيه بيّح كنينه فرحة يتيم ٍ .. ليلة العيد ما نام ! خالاته , وخواله .. مواعدينه مواعدينه بشت .. وشماغ بسّام ويلّعبونه .. في ملاهي المدينه مانام .. واحلامه تحّراه قدام كنه يطول أحلامه بـ ( راحتينه ) ! صبحه تجّلا نوره بـ / عيد الاسلام وقبل يروح المسجد : ملّبسينه جده ما بين العين والجيم واللام خلّيه يافلانه .. ولا تأخرينه ! تراقبه بـ / عيونها .. حب وهيام وعيونها .. ممّا تكنّه / حزينه "يعرض لها الماضي مثل عرض الافلام " لـ .. ماضي ابوه وغلاه وحنينه يرجيه لـ ( سنين القسا ) درع وحزام وجنب ٍ على صكات بقعا يعينه ابو ثلاث أعوام .. والا 4 أعوام يغار منه البدر .. من كثر زينه صلّى وجاء وأمر الله اللي قضى تآم ماهوب داري عنه .. زينه وشينه بشته عليه .. مهندم ٍ خير هندام واللي بـ / عمره .. كلهم محترينه يوم اطلعوا للشارع انقسموا أقسام وأهم مافي القصه ؟ ملّعبينه تداعب رموشه .. ذعاذيع الانسام ويابردها .. يوم آيبست شفّتينه وعلى تراب الأرض بأصبعه رسّام أما رسم له طير .. والا سفينه العيد طعمه كان في الشارع العّام ماهوب عن رغباته .. مقيدينه رجع ولكن فرحته ضايعه ( دام : كل ٍ مشى ) وأخذ ولده بـ / يمينه صاروا خواله في نظر عينه اصنام آحيوا بـ .. داخله الجروح الدفينه ولا عنده الا أمه وناب القهر سّام جاها يبي منها اليدين الأمينه شعوره اللي حس به مثل الإلهام وأول سؤال في باله : أبوي وينه ؟ سؤال : لكن كان مثل النبا الهّام لازال باقي في المسامع .. رنينه جته تعدي , ماهو تخّطي بالاقدام وشالته بيديها .. وحبّت جبينه أبوك : جاء البارح وقبل الفجر قام وشرى لك ألعاب , وهدايا ً ثمينه تراه حبّك وأنت غارق في الاحلام وراح لـ .. دوامه , والشغل مرسلينه لحظه .. وهو بين الحقايق والأوهام والدمع الازرق حاير فـ .. مقلتينه يمّه : ترى مانمت والعالم نيام ماجاء .. ولا لمست يديني / يدينه مدام رقمه معك من بين الارقام بـ .. أكلمه , يوم إنك تكلمينه ! طاحت ما كن آلها من الصدمه عظام ولاعاد فيها صبر .. ولا سكينه قالت بدون شعور وإدراك وإلمام أبوك ! في تراب القبر دافنينه العام مات .. ومتّ من موته العام وكني بعد مامات عني سجينه أبوك جندي للوطن ضد الإجرام عطاك عمره دون داره ودينه تفجّرت من تحت رجلينه ألغام ولاعاد لي بعده حصون ٍ حصينه بكّت .. وطاح الدمع من حر الآلآم وبكى وطاح الكون من موق عينه كل ٍ عذلها .. بين عاتب ولوّام تصّبري .. خلي ضلوعك متينه ماهو صحيح ان الضروره لها احكام اكبر خطاء يوم إنك تعلمينه بكره تنسّيه الليالي والايام هو فيه أحد ينسى حدا والدينه ؟ طير السعد في عالمه مابعد حام والله يعلم وش تخبي سنينه أنا كذا ! ساكت وصابر ومنضام لكن كان الفرق بيني وبينه : الدمع لـ .. عيون الأرامل والايتام ودمع الرجل ذل وهوان وغبينه ! |
قصيده معبره للغايه ي مبارك
صح لسان شاعرها وصح نقلك , وكل عام وانت بخير |
سمو الذات
وانت بخير ياغالي ويعلم الله اني افرح بشوفتك حياك الله يالغالي |
مبارك الله يسامحك على ها لتصوير الموئثر جدا
الله يعين على الدنيا عموما ارجع واقول لك شكرا جزيلا مع تحيات اخت العرب |
الله الله
اختيار مميز يابوحمد صح لسان مشعان وسلمت |
مبارك الله يسعدلي هالأطلاله الجميله
ابدعت فيما نقلت وصح لسان الشاعر كل التقدير لك |
الله الله اختيار مميز يابوحمد صح لسان مشعان وسلمت |
ابو حمد صح لسانك واختيارك وصح لسان شاعرها
لاهنت على النقل ولك كل الود |
أخت العرب غيوم نجد
ياحياك الله وفعلاً القصيده مؤثره جدّاً وخياليّه جدّاً حياك الله ومرورك شرفني |
ابن نما
ودك ان المنتدى اللي فيه ناس تتذوق الشعر مثلك ماتحطلهم غير مثل هذي واللي أحسن منها والله يسلمك ومرورك يشرفني حياك الله يبو راما |
ابو رامي
إن كان للجمال عنوان فهو جمال حضورك وتسلم على الكلام الطيب ياطيب حياك الله |
روووعه أقوى شيء
شكراً |
االمشعاب
التميز هو وجودك هنا لاعدمتك حياك الله ومرورك تاج على راسي |
ابو اياد
ولا انت يالغالي وصح بدنك حياك الله وافرحني مرورك الغالي على قلبي |
حره على كف صقار
مرورك زين اقوى شي وتسلمين على المرور المشرف يا اخت العرب |
| +4. الساعة الآن 09:32 PM. |
Powered by vBulletin® Version 3.8.12 by vBS
Copyright ©2000 - 2025, vBulletin Solutions Inc.
جميع مايطرح في المنتدى لا يعبر بالضرورة عن رأي إدارة شبكة قبيلة الغنانيم الرسمية وإنما يعبر عن وجهة نظر كاتبه فقط