|
كـــريم و كــروم
http://img01.arabsh.com/uploads/imag...31434d6df1.jpg السلام عليكم ورحمة الله وبركاته ومساكم الله بالخير يشرفني ان اقدم لكم من خلال هذا الموضوع عددً من قصائد جدي/ كروم وعمي/ كريم آبناء عبد الله بن عاذي رحمه الله واطال في اعمارهم على طاعته ورضاه،، سيكون الموضوع متجدد بمعني اني كل ماكنت فاضي جبت لكم قصيده ثنتين،، وسلامتكم |
دايماً افضل ان ابدا بالمدح وخير مانبدابه
قصيدة لعمي كريم في الامير الراحل/ عقاب بن مرزوق بن ماثل وبصان http://img01.arabsh.com/uploads/imag...30424f6cf6.jpg
شيخِ عطانا البقس يجزا بالاحسان = مدة كريمً مايبانا نجازيه جابه بعشرين الف للورع مجان = من معرض الطائف بعدد سددو فيه شيخً يحوش المرجله سر واعلان = عقاب ابو بندر عسى الله يعافيه من صلب اخو غزوى وماثل ووبصان = يوم ارتحل مرزوق صار العوض فيه وهذا الي اذكره من القصيدة |
قصيدة في مدح الآمير/ عبد المحسن بن حشر بن حميد آمير الفوج الرابع http://img01.arabsh.com/uploads/imag...30424f6cf4.jpg
قال من غنـى بعد جتـله مطـيه = كل ماهب النسيم يشم نوده جاه جمسن يشـرح الخـاطر هديــه = مـن أميــر لا عـدمـنـا الله وجـوده طول الله عمر من يعط العطيه = ماشحذته مار من طيبه وجوده ولوعطا ابن حميد ماهيب انكريه = طبع ابوه وطبع جده ما يكوده قاضبن من شايب قدمه وصيه = الامير الي سجاياه محموده مايقول القول واله اخلاف نـيه = مايغير كلمته واخلف وعوده مسند المـحتاج حمـاي الرديــه = طيـبن راسه وطيبه من جدوده زايدن عن سنته ميـه بمـيه = فيه عشر خصال للطيب معدوده الشجـاعه والشهامـه والحمـيه = والكرم والجود من جملة بنوده مايـزل ولا تجـي منـه الخطيـه = ولا تصيبه ساعه الحاجه بروده مكرمن جاره ولا يسرق خويه = ما نقص من راتب الجندي يزوده ذمته من راتـب الجنـدي بريـه = من عرينن تكسب الطاله وسوده فالرجال أوصاف عكاش وطميه = وانت مثل طويق شامختن حيوده فالشتاء يدفي وله فالقيـض فيه = وان لجابه خايفن يرقى سنوده وفيه مثل الرس ما فالرس ريه = كل من يرده يعافه ما يروده وانته هداج الروي مثله سميه = ما نقص هداج لو تكثر وروده مقدم الهيلا ليا جرت غزيه = تلطمون الي تعدى عن حدوده وانت ملجانا ليا كبرت قضيه = ياسندنا ياذرا البيت وعموده كريم بن عبد الله بن عاذي |
وهذي في الآمير / نايف بن عبد المحسن بن حميد http://img01.arabsh.com/uploads/imag...30424f6cf5.jpg عندما تولى امـآرة الفوج الرابع خلفً لوالده
يامير مبروكن عليك الوظيفة = جعله يساعدك النصيب بعملها لو نافسوك اهل العقول الضعيفه = تموت رديان العقول بزعلها الحق حق ولا على الحق خيفه = من حقكم يامير وانت من اهلها كسبتك للنوماس ماهي طريفه = هي الك ياطير السعد وانته اهلها ذخرن لكم يامير ماهي خطيفه = وراع النميمه فالقفا يحتملها قبيلكم فالكون رجله خفيفه = مبلغن بفعالكم ماجهلها انتم جبالن شامخاتن منيفه = تذري ليا من المجنا دخلها يوم المغازي والطمع والنكيفه = كلن تعد افعاله الي فعلها هاك السنين المعجزات المخيفه = ياطون عسرات الدروب وسهلها افعالكم بين القبايل شريفه = لاقامت الهيجاء وقتم نفلها من ضمنها نجد الطموح العفيفه = كثرت مزارعها وبنيت فللها الشيخ ابن هادي وشالح كنيفه = شوا وخلوها لشيخٍ نزلها شيخً يعرف مايجوز تعريفه = كم هجمتن غب الصباح يعزلها ابوك ريف الضيف للي يضيفه = بلهان شيال العلايق جملها هداج مايوصف بغيره وصيفه = سهيل زيزوم النجوم وزحلها عساك للراحل تصير الخليفه = تاصل مواصيلٍ بفعله وصلها ومن صار له توفيق ربي حليفه = نال المرام وكل عوجاء عدلها وياما فرقتوا من وليف لوليفه = وكم جادلن تفقد بعدكم بعلها وكم فارسٍ بالارض دقو صليفه = وكم مهرتن برماحكم جاها اجلها كريم بن عبد الله بن عاذي |
|
والله ونعم بكريم وكروم وفي عقاب بن وبصان
وفي ال حميد وشكراً على ايراد هــذه القصايد الجميله تقبل تحياتي وتقديري |
مساء الشعر ،، والارث الانساني الثري ياكروم الحبيب ،، اسمك على اسم جدك ،،
لا غرابة ان تتصف بكل هذه الصفات منذ نشأتك على يديه ،، وعلى يدي والدك الذي لايقل شأناً عن ابيه وعمه ،، وكل ابناء عبد الله بن عاذي فيهم الخير والبركة من شيخهم الكبير الى طفلهم الرضيع ،، جمعك لهذا الثنائي كريم وكروم ،، في صفحة واحدة لن يزيدها الى ثراء وفخامة في الطرحوالرقي الفكري الشعري ،، تزاحمت المشاعر وربك ياكروم عند رؤيتي لهذين الاسمين فمابالك وأنا الج الى المتصفح وأرى هذه الوجوده الكريمة النقية ،، ياخي مدين لك بالكثير الكثير وان جاءت هذه البادرة الطيبة منك متأخرة لكن ،، هي في الأول والأخير ،، سيرة عاطرة ماطرة لاثنين من اشهر شعراء الغنانيم في نظري واقدرهم على حبكةالقصيدة السلسة المتدفقة بجمال معانيها وعفوية اسلوبها الغير متكلف ،،بل واشددعلى هذه الـــ بل ،، تاتي القصيدة من احدهم كماء زلال عذب صافٍ لايكدره دخول المؤثرات الخارجية ،، دمت ياكروم ،، وداموا اجدادك ،، اجدادي الغالين الشامخين يا الغالي تحياتي وحبي الشديد لك اخوك : سلطان .. |
كريم وكروم من رموز قبيلتنا اللي نفتخر بهم دائما وأمثالهم وبيض الله وجهك ويستاهل شيخنا ابن وبصان والشيوخ ال حميد تحياتي وتقديري لطرحك المميز اللذي نور بمنتدانا الشامخ بمثل هذا الموضوع بيض الله وجهك أحترامي وتقديري
|
يعطــــــــــــــيكـــ الف الف عافيه
يابعدى الله يطوول بعمر جدك وعمكـــــ لاكن يابعدى تمنيت ان التنسيق افضل من كذا وعطنى من قصايد ابووك وعمكــــ سعوووود تقبـــــــــــل مرووووووورى |
اقتباس:
المشاركة الأصلية كتبت بواسطة الشاعر سلطان براك الغنامي http://www.gnanim.com/vb/gnanimxp/buttons/viewpost.gif والله ونعم بكريم وكروم وفي عقاب بن وبصان وفي ال حميد وشكراً على ايراد هــذه القصايد الجميله تقبل تحياتي وتقديري ماعليك زود طال عمرك.. ولاهنت وشاكر ومقدر لك تواجدك.. |
اقتباس:
المشاركة الأصلية كتبت بواسطة سلطان مطلق الغنّامي http://www.gnanim.com/vb/gnanimxp/buttons/viewpost.gif مساء الشعر ،، والارث الانساني الثري ياكروم الحبيب ،، اسمك على اسم جدك ،، لا غرابة ان تتصف بكل هذه الصفات منذ نشأتك على يديه ،، وعلى يدي والدك الذي لايقل شأناً عن ابيه وعمه ،، وكل ابناء عبد الله بن عاذي فيهم الخير والبركة من شيخهم الكبير الى طفلهم الرضيع ،، جمعك لهذا الثنائي كريم وكروم ،، في صفحة واحدة لن يزيدها الى ثراء وفخامة في الطرحوالرقي الفكري الشعري ،، تزاحمت المشاعر وربك ياكروم عند رؤيتي لهذين الاسمين فمابالك وأنا الج الى المتصفح وأرى هذه الوجوده الكريمة النقية ،، ياخي مدين لك بالكثير الكثير وان جاءت هذه البادرة الطيبة منك متأخرة لكن ،، هي في الأول والأخير ،، سيرة عاطرة ماطرة لاثنين من اشهر شعراء الغنانيم في نظري واقدرهم على حبكةالقصيدة السلسة المتدفقة بجمال معانيها وعفوية اسلوبها الغير متكلف ،،بل واشددعلى هذه الـــ بل ،، تاتي القصيدة من احدهم كماء زلال عذب صافٍ لايكدره دخول المؤثرات الخارجية ،، دمت ياكروم ،، وداموا اجدادك ،، اجدادي الغالين الشامخين يا الغالي تحياتي وحبي الشديد لك اخوك : سلطان .. هلا هلا هلا هلا ومرحبا يالله انك تحييه.. مرحبا والله ومسهلا. اول محاسن هالموضوع شوفتك.. ياهلا والله ومرحبا.. لي معك جلستن خاصه انت.. والله ويشهد علي الله اني من فرحتي بشوفتك مدري وش ابكتب لك ولا برد عليك.. |
اقتباس:
المشاركة الأصلية كتبت بواسطة صقر روق http://www.gnanim.com/vb/gnanimxp/buttons/viewpost.gif كريم وكروم من رموز قبيلتنا اللي نفتخر بهم دائما وأمثالهم وبيض الله وجهك ويستاهل شيخنا ابن وبصان والشيوخ ال حميد تحياتي وتقديري لطرحك المميز اللذي نور بمنتدانا الشامخ بمثل هذا الموضوع بيض الله وجهك أحترامي وتقديري ماعليك زود جعلك تسلم.. ووجهك ابيض يالقرم.. وشاكر ومقدر لك تواجدك الذي نفخر به.ولاهنت.. |
اقتباس:
المشاركة الأصلية كتبت بواسطة خالد قايل الغنامي http://www.gnanim.com/vb/gnanimxp/buttons/viewpost.gif يعطــــــــــــــيكـــ الف الف عافيه يابعدى الله يطوول بعمر جدك وعمكـــــ لاكن يابعدى تمنيت ان التنسيق افضل من كذا وعطنى من قصايد ابووك وعمكــــ سعوووود تقبـــــــــــل مرووووووورى الله يعافيك..وجزاك الله خير.. التنسيق متزهل به نواف. واما هالموضوع مقتصر على قصائد جدي وعمي كريم فقط. ولاهنت. |
يابو مها ما حصل نوم ومغاتير = البل يدور بها المرباع راعيها يبسط فراشه تحتها ماش تصفير = واليا سرا سروها يسري مساريها الي يبا البل يروح عن الغنادير = يصبر على البرد والعشقه يخليها يمشيبها ما يحسب للمخاسير = ومعصبن غترته يتبع مشاهيها يقضي نهاره مصاريف ومشاوير = يروح قدمها ويشوف تاليها كنه مسمر على الجيب بمسامير = من طلعت الشمس لان الليل يسميها يازينها العصر في وقت المخاضير = في ديرتن ما مشى راع الغنم فيها هذى ملاقي وهذلي معاشير = والهرش تسمع هديره عند تاليها متعه لو العمر قافيته مقادير = وصدوف الايام لانامن قوافيها كروم بن عبد الله بن عاذي[/center] |
خمسة اشهر نتبع العرب سمحات الخدود = ادفع الذود المغاتير وامشي في هواه زال شرهه نيها فوق اباهرها يزود = منوتي يابو مسلم وشفي بالحياه ربعت في ماقعن مامشو فيه القرود = ولا نزل حوله مرب العفوش ولا رعاه ودي اشرح عن محله وابين له حدود = لان من سمعه يعرفه لونه مامشاه من نفود القوز مرباعها غربن سنود = الاباهي قبلتن منه والضاين وراه ومن مشان الضلع قبله جنوبي النفود = جعل كل مروحن يامره ربي علاه وعاشو اللي ذرو الملح في عين الحسود = خلو الحساد يسكت على خافي بلاه زالهم معي الثلاثه وعندي فالوجود = ماحسبت حساب غايب ولا مشفن علاه كريم بن عبد الله بن عاذي عام / 1413هـ [/center] |
والله ونعم بالثنين وبذريتهم
متابعين للقصائد الفرائد تحياتي لك |
صح لسانك جدك وعمك ومشكور؟!..
|
والله ونعم بكريم وكروم وفي عقاب بن وبصان
وفي ال حميد وشكـــراً على ايرااد القصآآآئد الجميلــه ... |
والله ونعم في كروم وفي كريم وفي عقاب بن وبصان اللهيرحمه
والله يرحم الشخ عبد المحسن بن حميد ويرحم نايف ويرحم اموات المسلمين ومشكور يا كروم ياسمي العود على ماقدته الله يحفظك |
اقتباس:
المشاركة الأصلية كتبت بواسطة ابن نما http://www.gnanim.com/vb/gnanimxp/buttons/viewpost.gif والله ونعم بالثنين وبذريتهم متابعين للقصائد الفرائد تحياتي لك ماعليك زود جعلك تحيا.. لاهنت يالقرم.. |
اقتباس:
المشاركة الأصلية كتبت بواسطة سليمان سلمي الغنامي http://www.gnanim.com/vb/gnanimxp/buttons/viewpost.gif والله ونعم بكريم وكروم وفي عقاب بن وبصان وفي ال حميد وشكـــراً على ايرااد القصآآآئد الجميلــه ... ماعليك زود جعلك تسلم.. لاهنت. |
اقتباس:
المشاركة الأصلية كتبت بواسطة سامي العتيبي http://www.gnanim.com/vb/gnanimxp/buttons/viewpost.gif صح لسانك جدك وعمك ومشكور؟!.. صح بدنك |
اقتباس:
المشاركة الأصلية كتبت بواسطة أبو بتـــــال http://www.gnanim.com/vb/gnanimxp/buttons/viewpost.gif والله ونعم في كروم وفي كريم وفي عقاب بن وبصان الله يرحمه والله يرحم الشخ عبد المحسن بن حميد ويرحم نايف ويرحم اموات المسلمين ومشكور يا كروم ياسمي العود على ماقدته الله يحفظك ماعليك زود جغلك تسلم.. لاهنت يالقرم لتواجدك.. شكراً لك.. |
يا محمد عب خزان الوقودي = والخساره يامحمد من حلالي لا توفر فيه بنزين السعودي = وانت لا مكسب ولالك رأس مالي نصف بالموتر ونصف بالنفودي = وانت من راتبك ما ينقص ريالي صاحبي دونه جراديح الصمودي = دونه الجال المقابل والموالي لو بالي البعد ماني بمحدودي = فيه من يقطع جراديح السهالي كن حسه يوم يفتر العمودي = حس ندرن في مقاديم الخيالي يوم ونة قربته وارخى العضودي = ينشرح عني جميع الي طرالي ما حداني عنك ياشبه العنودي = ياحلي الي تعروج للغزالي غير عمره يوم اشوفلها لهودي = يوم يزمي نيها يرتاح بالي كروم ابن عبدالله ابن عاذي |
زادت علي الضغط كلمة إبراهيم = لا عاد ينطق نعنبو هالنمونه ان عادها الهندي علي الملازيم = لا اطى على خده وافقع عيونه لا يندب العشوى لعين المراسيم = ندابها الي فالخطر يسمعونه يوم اعتزاء دون البكار المراديم = ازروا طماميع الذويبي يجونه يوم الحقوا فرسان حرب الصواريم = عياء على الذود المطرف زبونه عياء علاها يوم لحقوا مكاظيم = شافوا وسمعوا وانكفوا مايبونه والطيب والنوماس حظ ومقاسيم = كم واحدن مرهي تغره ظنونه لا قامت العجة ولبس السماء غيم = والي يطيح يكب ما يرفعونه جدي وعمي فعلهم يجلي الظيم = افخر بهم وافخر بما يفعلونه يا جاهلن فعل الرجال الشغاميم = ما شفت راس حليس فاخت متونه خيالهم يرو العطاش المضاريم = واليا طعن خصمه يجود طعونه وان كان رامي يلحم النار تلحيم = عند اللزوم عيارها ما يخونه كريم بن عبد الله بن عاذي |
الله على اللي مديله و اردن تالي = الفين واثنين لوحاته خليجـــيه
مكملن فـي حفيزه كل الاكمالي = ما رهموله زوايد فالسعوديــه ابا اتفسـح علاه ايام و ليالي = اخذ بها عبر ولا الروح عاريـه ابا ليا شيف برقً يشعل اشعالي = مسيلن من سنام أليا الحناكيــه يبرا لوضحً علينا حقهن غالي = عافت ربيع المقاسم والرويليــه تبالها ما قعن مخلي بعد سالي = من الاباهي وعرق القوس ورييه من يوم طاح المطر ما جاه نزالي = ماكفت القهب لمشان الشماليــه اخيرلي من غنم قدوس واشوالي = لو اترك الفرق وحماره وهنديـه كريم بن عبد الله بن عاذي |
ياعيد عان المزن برقه يلوحي = يمطر على أطراف الخوامه سحابه عساه يسقي ممحلات الصفوحي = من المطار اليا ضواح الغرابه ويملا مطرها كل خبراً مروحي = وتسيل منه الاودية والشعابه يا عيد ماجد علمه كان يوحي = قدام علماً ما حساه وهقابه مانيب بايع للشناح الطفوحي = لو زودوا فيه الثمن ويش ابابه والله ما ابيعك ياعديله لروحي = على مدور مكسبه فالقصابه تكفا يا بو نواف زبن اللدوحي = الصبر ذل ليا تعدى حسابه اقعد لهم واللي يجي لا يروحي = يا شوق من كن القمر في لبابه أبرد بهم همك وبرد جروحي = والخصم دون حقوقنا لا تهابه أما نحصل سمعتاً بالمدوحي = ولا نذل ونعترف بالعيابه أما شربنا الماء شراباً نشوحي = ولا تبرهج شاربه واهتنابه من هم فالوضح المصاغير بوحي = والله وبإذن الله ليخسر شبابه والله لنوصلهم ديار الملوحي = والا نعديهم مطير لشبابه عنها طردنا طايلين الشبوحي = محمد بن عقاب ذيب الذيابه وحليس طاح ودم قلبه يفوحي = الله يرحم جدنا الي رمابه عقيد قومن يقطعون السروحي = جبلان تعرف في نهار الحرابه والخيل في ام ارطاء ذبحها ذبوحي = ومن جاء يبا العشوى نجود صوابه كم فارسن خلي يصيح وينوحي = يكثح على وجهه ذواري ترابه والشمط فالواقع تعاين وتوحي = ولو انشدوا ضلع المضيح حكابه والنا الفخر بأفعالهم والفروحي = ولا يذرب الرجال لو استنابه قله يجي شوق الهنوف الطموحي = ولا يذل وينهزم لا يجابه قل للطروش مدورين الصبوحي = ما عاد به قولت هلا مرحبابه جابو لنا الشرفا هبودن رموحي = لابه حليب ولا تكسب جلابه وقدامها جو بالرعيل المسوحي = حليبها في الخلف الأيمن صرابه وأستعفر الرب الغفور السموحي = اللي شمل عفوه ويشمل ثوابه كريم بن عبد الله بن عاذي |
الجيب يشرح ضميري حس ماطوره = ليا عطا مع جراديح الخلا الخالي اليا عوت قربة الماطور وسيوره = وانا مع ارضن خليه ينشرح بالي انعشقه سايقه والخد ممطوره = ونت سيوره وجا للحزم زلزالي ليا اونس الترس يقنب واعتلى نوره = قنيب ذيبً معدينه هل المالي يبا العشاء وحدوه وحان مقدوره = اعن الغنم جنبوه اكروف الانذالي ماحزموا سستته بالحبل بالحبل مكسوره = هو منوة الي يبا قطع اشهب اللالي نجزم على الدرب والاقدام ماموره = لون قدامنا مضماه وارمالي مانشتمت من دكاك الحزم وصخوره = لون خطه عطاله رمل واجبالي والله لونه ورد فالصيد وعصوره = للحق به القايدة وارجع على التالي معروفتً شركته بالطيب مذكوره = ماتنتج الا الحديد الصافي الغالي اخبارها مع جميع الناس منشوره= لاوالله الا شركتن مالها امثالي تستاهل المدح والعدوان مقهوره = لون من مدحها الحساد زعالي والشركة الي تجيب الجيب مشكوره = والي يعارض يطق براسه الجالي كروم بن عبد الله بن عاذي 1399هـ |
قصيدهً لعمي كريم في جدي كروم. ياراكب الي وارده منتقينه = هافِ من الي يقطعن الزراجه مكملن زيته وبانزينه = وعلى مساميره ختوم الخواجه ليا دق سلف ورن س المكينه = يشر ضمير دريوله بنزعاجه ليا عشق الثالث يهيض ونينه = شرقت شعاع الشمس شرقة زجاجه تقول شيهانِ هله مطلقينه = سمكة عجاج الصيف سمكة عجاجه ياطا القحاطم مع خطوط المدينه = وينشد عن العتبان قضاي حاجه ترى مطير مراحهم خابرينه = دور خبرهم وانشد الي تواجه من دون خشم الهضب الاسمر يمينه = والدرب سمح ولاش فيه انعواجه تلقون ابو نواف ياواصلينه = آول مباشره الك ضحكت حجاجه قال اقلطوا ياجعل ربي يعينه = لكبشن يزود قيمته عن حراجه وقدملهم كيفِ بلطف وسكينه = من ذاق فنجاله يزود ابتهاجه وقله ترانا في دبول الدفينه = في ماقعٍ يدوخك صجة دجاجه كريم بن عبد الله بن عاذي 1391هـ |
ملحمة الغنانيم
تقريريكم ياسعود ماهوب سنه = انتم كذبتوا والتقارير ملغاه معتوق تعليماتكم غلطنه = ولغيت تقاريره وجابر طردناه واللي حدود املاكنا يجهلنه = ينشد ويلقا حدن كان يخفاه حدودنا ناقف على حدهنه = وليا تعدا حدنا مالحقناه شعبان ابو نبعه ومابينهنه = اليا طوارف جبو واقصاه وادناه وطلعت مقر هلال شرقيهنه = وحدودها الغربي شعر ويتعداه ومن الجنوب النفر وضروسهنه = وشمالها زملة هدان المسماه هذا وطنا مالحد فيه منه = ملكن لهنا الاولين ورثناه في القيض مضمى كل وضحى مضنه = وان لاح براق الثريا نزناه واليوم فيه املاكنا يثبتنه = الغرس ينعم والعماير مبناه عدن سبيلن ماه محدن يمنه = لا طردوا ورده ولا بيعوا ماه اقنع حضيض لا يجي حولهنه = لو جاب له صكن مميز نقضناه اوامر ابن شعيل مايمنحنه = السرق درق وكل خاين كشفناه سمى جباله بسم غير اسمهنه = واستبدل الموقع وغير مسماه اسم امهات قباع ماينفعنه = لو جاب ابن غثيان شاهد ووصاه وياعلي علمنا متى جيتهنه = حددنا التاريخ لناس تقراه ليتك حضرت اللي حصل عندهنه = حتى تعد الصدق والكذب تنساه يوم لحقوهم.. مهملين الأعنه = يبون قطعانن عزيبن مسراه وقتيلهم سحم الضرايا كلنه = وقتيلنا في قوعهنه دفناه ودون الودايا الخضر وبيارهنه = نرسي ومن جانا يبها لطمناه اللي بغاها قبلهم خاب ضنه = ولد الرطاعه دونها جاه مكفاه دفع رشايا مار ماملكنه = وقفا عنه بالقلب الأبيض وخلاه اقفى عقب عض النوواجد بسنه = جعله مهفه مقيط في البير ورشاه الملك بين املاكنا لا يضنه = اليا رحل عواض عايض تقفاه .. وياسعود اوامر عدنا يحتمنه = واما حماه امر الحكومة حماناه باللي اليا بان الهدف يطرحنه = ليا وقعت في صامل العظم تشضاه يشهدلنا الماضي على فعلهنه = ويثبت كلامي كل فعلن فعلناه ولد الدويش حسين من ضربهنه = خلي لعكفان المخالب تهاواه وابن غصيبه في المخيط احذفنه = وابن معضي عن جواده طرحناه واليابسي بعد رمانا رمنه = ذبح ركايبنا وحنا ذبحناه والشيخ ابن جبرين مثله وكنه = حول به اللي راس رمحه تعداه وردو علاه الخيل وستلحقنه = وكروش ابوا هاجد ذبحها بشلفاه وحليس طاح وبالحوافر وطنه = يوم لحقنه يشهرون المثاراه وتوارده رمحينهم وعثرنه = وجابوا جواد حليس صفراء محلاه ولا الذويبي عقب مركاضهنه = يشهد بماشافه عيونه وموحاه جانا يبي حمى الذرع وطردنه = وميشع هرب رجلي وغوجة قلعناه وعسير ابن نافا نهار الحقنه = فرسان ربعن يلحقون المخلاه ذبحن وقفاه الرجل شيخنه = وغنا بقافه كل من حوله اوحاه وفي قاع حاضى فعلهن ورخنه = البل حميناها وتنضب كسرناه وركابهم ماعودوا فوقهنه = اللي سلم منهم هرب فوق رجلاه ويووم الحقن موهق بفريسهنه = وش قال ماثل يوم ابن غتر ناداه قال الحقوا لحدن يجي فيه لنه = وكلن وسيقه ياحميدان ينخاه نقلع جياد الخيل ويجيبهنه = ملوح واللي عن شعيه طرحناه نلحق ونلحـّق من قعد فوقهنه = ورديفنا نستلحقة ماتركناه مثل الثلاث اللي برز فعلهنه = ردن على من حيل دونه وجبناه ردن على ممنوعهن ولحقنه = فعلن يشرفنا مجاله وطرياه لو ان جمع سبيع قدامهنه = موت الشهادة مانخافه ونخشاه هاجد رجع لحمود يوم حجرنه = وصعيقر استلحق مناحي ونجاه وابن جواعد ردها مثلهنه = على رديفه يوم يوحيه ينخاه وتراء الدخيل وجيهنا يمننه = اليا لجى في وجيهنا ماحدن جاه لو السلوم عن الدخل يحرمنه = ادخلنا ابن سحمه وعانيه شناه كريم بن عبد الله بن عاذي |
اللي يعرف العلم لله دره = وليا تعرضلك عما القلب يعميك العلم ضايع فالعمى لو تبره = قلبه عمى لو ان اذانيه توحيك مقتطفة من احدى قصائد جدي كرّوم بن عبد الله بن عاذي عام 1417 هـ |
ابا الحصيّن تحصله بالمذاري = والذيب يجري يصبح الصبح مانام يقطع جراديح الخلا والصحاري = رزقه على محص الليالي والايام لا تاخذ الدنيا هجوس وطواري = ماضيع الي قدمنا غير الاوهام لو النصايح بين بايع وشاري = شريتها لو راقد القلب ماقام كذالك لجدي/ كرّوم بن عبد الله بن عاذي |
عام 1425 باع ابوي بعض البل حول 10 يبي يصفي المنقيه :)
عاد تسن العواده اخذوا في خطرهم وقال عمي كريّم هالابيات.. ( يطيع النصيحه ) لو كل من ينصح يطيع النصيحه = ماماج عن درب الرياجيل مخلوق الشايب الي ماقعدله منيحه = راحت نياقه عمد ماهوب مسروق وضحٍ لها فالوضح ميزه وليحه = تعرف بشهرتها ليا عدة النوق رثم الخشوم ام الخدود السميحه = حول عليها القوس واستاقها سوق والثانيه شيلة بونش الذبيحه = ربططة قوايمها ورميت بصندوق وبعد فعول مدورين المديحه = عينه تعاف النوم والقلب محروق ويصبر لون الكبد منها جريحه = والصبر زين وكل مطرود ملحوق تعب عليها فالسنين الشحيحه = ورعابهن الخزاما وزملوق وعقب الرغاه الي تحتها السريحه = يطبخ له الراعي عصيده ومرقوق ولولا العلوم الي بعدها فضيحه = والله ليرمي دونها كل معلوق والله وبأذن الله ليذبح نطيحه = ان كانها سلمت يمينه من العوق كريم بن عبد الله بن عاذي 7/1425هــ رد ابوي على عمي ( متيه الوضحا ) العود يالشاعر عسى الله يبيحه = حقه ترا عندي على الراس من فوق والرجل ندري وش يبا من نضيحه = نعرف ترى المقصود من غير منطوق والوضح لولا حاجتلي لحيحه = مابعتها لو يدفع الطاق مطبوق لاشك حق الناس مانستبيحه = ولاعمرنا عشنا على الغدر والبوق اخذ الحقيقه والعلوم الصريحه = ولا ترى الطالات قسمات واوفوق والخير واجد يالوجيه الفليحه = واجد بنات الهرش مافيهن فروق يازينهن لاجت عصيرن مشيحه = والوانها تفقع كما لون غرنوق وباقي ترا خمسين ليله صحيحه = وتشوف ردم المزن ورعود وبروق وان صدق الوسمي وبكر مطيحه = هي منوة الشايب ترا ياولد روق اليا اختلط عشبه ورمثه وشيحه = وغير الخزاما والنفل فيه رقروق يجيك ابو نواف تسمع فحيحه = متيه الوضحا بطراف ساحوق عــيــد بن كـــرّوم 7/1425 هـ وسلامتكم |
حول الايام هذي ولكن قبل 18 عاماً كانت هذهِ القصيدة.. :)
القيض راح وجاك وقت البرادي = وقامت تذعذع من شمال النسانيس غلق حساب القيض علمٍ وكادي = ونجم السويبع شيف قبل الغطاليس اقفن ليال وجن ليالٍ جدادي = تجددن من عقب ماهن مراميس واليا أعلن المقناص صحف وروادي = تولموا يا كاسبين النواميس ويابو سعود الصبر عدا وزادي = فكوا عن اللي تسعة أشهر محابيس نبا ليا غطا البياض السوادي = نسري ليا نامت عيون الهداريس خطوا الهبيل الي ضعيفٍ ربادي = ماقط هد فروخها والقرانيس متمددٍ كنه جضيع الوسادي = في مرقده تدوي عليه الخنافيس واليته الي مثل ظبي الحمادي = تنهمره وتقول مابك حواسيس قم هات خبز وهات عشره زبادي = عجل علانا يابعيد المناطيس وقحص يخمع طار عنه الرقادي = قد مرست قلبه من الذل تمريس يهاجم الخباز كنه مفادي = يداحم الورعان راسه دلاسيس واشتال باغاته وجاها يرادي = جعله يرادي وسط قصر المحابيس ولانصبح الا في ديارٍ بعادي = فوق الجيوب ولانهاب التغاريس وزان المضحى للوجيه البوادي = ونادوا بفنجالٍ يداو المعاميس ودار الكلام وصار فيها عنادي = وكلٍ يقول فعول طيري بلا قيس وقاموا بصارومٍ سريع الهدادي = لحاق ماياخذ علاها مراويس مخالبه مثل الرماح الحدادي = دوام من دم الحباري معابيس اما ضربها نطح بين الثنادي = ولا صرم نصف الضلوع المقاويس ويازين هده في خطاه الرهادي = في ماقعٍ قفرٍ من الناس ماديس بكر علاه اوسم بقران حادي = لان الزهر غطا خشوم الطعاميس وعز الله ان الصيد غايه مرادي = لو اتركه كثرة على الهواجيس حبه يعادل حب قطم التوادي = رثم الخشوم ونابيات النسانيس وياوالي القدره عليك اعتمادي = مدك ولامد الوجيه المفاليس عطاك مايشبه عطايا زهادي = ولا دون بابك واحدٍ يربط الكيس وختامها صلوا على خير هادي = على نبيٍ درس الحق تدريس كرّوم بن عبد الله بن عاذي الغنامي 1415هــ |
| +4. الساعة الآن 01:09 AM. |
Powered by vBulletin® Version 3.8.12 by vBS
Copyright ©2000 - 2025, vBulletin Solutions Inc.
جميع مايطرح في المنتدى لا يعبر بالضرورة عن رأي إدارة شبكة قبيلة الغنانيم الرسمية وإنما يعبر عن وجهة نظر كاتبه فقط