منتديات شبكة قبيلة الغنانيم الرسمية - أمانه معك بالخير تذكرني

الله يسامح غيابـك كيـف دمرنـي
والله يسامحك قبل يسامـح غيابـك
ياما على ديرتـك هالحـب يأمرنـي
لو أن دربي صعيب يهون لحسابـك
ماني بلاقيك بس الشـوق سيرنـي
أجيك ساري الين أوقف على بابـك
لوشفت شوقي قسـم بالله تعذرنـي
والله غيابك لعب بالحيل فـأحبابـك
جبرك ظرفـك تخلينـي وتهجرنـي
وإلا أنت خوفك علي حتى من أقرابك
لك ذكرياتٍ عليها الشوق يجبرنـي
في كل ذكرى تمر أمـوت وأحيابـك
غايب وأشوفك تجي يمي وتسهرني
أتخيلك وأبتسم وأحضنـك وشقابـك
أقعد أسولف وأقول البعـد بعثرنـي
محتاج لك والله اللى برحمته جابـك
أقراء رسايلك في غيابك وتقهرنـي
فيها الحزن والفرح والشوق وعتابك
أول رساله وصلتني منك تشكرنـي
على أهتمامٍ لمستـه زود إعجابـك
في وقتها فرحتي بالحيـل تغمرنـي
نسيت حزنـي وهـمٍ راح بأسبابـك
وأخر رساله بظرف البعد تخبرنـي
تحلف لي أن الدمع ما فارق أهدابك
تقول عذراً على الفرقـى وقدرنـي
والله يهنيك في دنيـاك وأصحابـك
كانت رسالتك فيهـا اللـي يدمرنـي
أدري بأن الجرح ما كان في حسابك
جيت أتصل بك وخفت الدمع يكسرني
ما أبي تشيل الحزن يكفيك ماصابـك
أكتب لك وساعة الفرقى تحاصرنـي
من سرعها زحمة الأفكـار تتشابـك
والله أحبك عسـى ربـي يصبرنـي
ومهما تسافر بكون أقرب من ثيابك
هذي أمانه معـك بالخيـر تذكرنـي
يمكن بعدها تموت ولا أعرف ترابك
بعيش عمري لحالي وأنت خابرنـي
ياما كتبت أوعدك ماأنساك في كتابك
وينك . علامك . رحلت ولا تناظرني
من عقب شوفك وشرح الحال بغيابك
أثره خياله خذاني بعيـد وسهرنـي
نفس الشكل والملامح والوعد حابك
الله يسامح غرامـه كيـف دمرنـي
ناظر ياقلبي حبيبك ويـش سوابـك