يافهيد شب النار مع باحة الشـوف
ترى حلات الكيف مع فكـة الريـق
عان الحطب في ثنوة الدعب مجعوف
والما من القلتـه قـراح المذاويـق
أخذ الكريك وحـط للنـار مجـروف
نـار عليهـا يجلسـون المطاليـق
خل الخشب في ترعة النار مصفوف
وادفق عليه القاز من فـوق تدفيـق
ولا جا لشعلتها تواشي وعاصـوف
حط البريق وفـرق النـار تفريـق
ومن ماركة بغداد قم هات لي نـوف
عفراً تنافـس بالبيـاض الغرانيـق
عفراً طويلة جيد والوسـط ملهـوف
مكبوسة الغطوه على حلقها الضيـق
طويلة العرقوب والخشـم معكـوف
جبرة حديـده والجوانـب لواهيـق
من البكار العفر تاخذ لهـا وصـوف
وتاخذ وصوف ملهفـات السماحيـق
تاخذ لهـا منهـن مثنـاه وكتـوف
لوكان محرقها سنـا النـار تحريـق
والثانيه رسلان والشكـل معـروف
والثالثـه رسـلان والرابـع بريـق
واحمس لنا بـنٍ شرينـاه بزيـوف
جابـه يمانـيِ عيونـه بلاحـيـق
من شجرته من يم خولان مقطـوف
من وارد الخـولان مافيـه تبريـق
خابرك انا يا فهيد فالشغل شاحـوف
وموفق فـي حمسـة البـن توفيـق
لا تنطل المحماس يا فهيد فالجـوف
اخاف يلحقها سنـا النـار بلحيـق
للنار جوف وجال وجنوب وطـروف
وللحمس افهق صالي الجمر تفهيـق
حفها على سمرِ شديد اللهب حـوف
حتى تعرق من سنا النـار تعريـق
ولا اندار لون الحب ثم صار مشيوف
جاللنجاض ابهـا صفـار وتراميـق
قم صبهـا بمبـردٍ عـود وسعـوف
مقمـرٍ عـوده يجـي لـه تباريـق
ثم هات لي نجر كما الطير مكتـوف
وقفـة نـداويٍ يتـل المسابـيـق
اطول من الرسلان يوم انها وقـوف
ليا ناشها المهوى يجي له تصاعيـق
ولقم وبهر واودع الهيـل مدغـوف
ومن العويدي ذوق الهيـل تذويـق
حتى يجي الفنجال ليا صار محيـوف
دم الغـزال اللـي يجـي فالمعاليـق
والا الخضاب اللي على كف غطروف
نجلاً تخـازر بالعيـون العشاشيـق
يجمدعلى الشـارب لياصارمشفـوف
وصف الخويرإن صارفالوصف تدقيق
بريةٍ تبعـد صلـف كـل مصلـوف
تجلا العمس ماهيب شاهي سواويـق
ليا ذرف منها علـى الكبـد ذاروف
يبي يهـود شـارد الفكـر ويريـق
هات الشداد وعطني الجاعد الصوف
فراش اهل هجنٍ تبـوج الرقاريـق
تراي انا والهـم لايـف ومليـوف
وهجسي من البارح يجي له تخافيـق
وليا عزف هجس الغنا كل معـزوف
تنفـك بيبـان القصيـد المغالـيـق
جني بنات الفكر زافـات وصفـوف
وقمت اتخير في قـراح الطواريـق
للشعر مثل الصيد قطعان وخشـوف
الصيـد طعمـه والنـوادر توافيـق
نبا نخلي عاصـي البيـت معسـوف
ثم راحت القيفان عقبـه مواسيـق
وليا اعتدل هجسٍ له ايـام معكـوف
يمـة طريـق معلقـات العشاشيـق
ياصاح انا قلبي من الـود مشعـوف
حب البنات ملصـقٍ فيـه تلصيـق
شاعيه مجمولٍ ولي فيـه معـروف
وموثقٍ لي معـه بعـض المواثيـق
غيدا النوابي عمرها متـن وردوف
زملوق غصنٍٍ من طـوال الزماليـق
ليا بينت خـدٍ كمـا بـارق قنـوف
رخم السحاب اللي خشومه مدانيـق
وعينٍ هدبها لا شبح كنـه سيـوف
عين اشقر مرباه روس الشواهيـق
تنسف فليل غاطن ٍالمتـن منسـوف
على مثل غرمول عـرق الصعافيـق
مرودمٍ بالحـال ماهيـب حرجـوف
ولا شافها راع الهوا جالـه شهيـق
ملهوفة السرجوف والجسم غظروف
والمفرع اللي فيه للشمس تشريـق
صدرٍ تقول من ابيض القطن مندوف
طلـع النهـود مفتـقٍ فيـه تفتيـق
ياما عليك الاحي الـورق واسـوف
ورق على دوحٍ غصونـه مواريـق
أمـر بيتـك واتعـداك واطــوف
وانا على شوفك شفـوق المشافيـق
ادرا علـى سمعتـك واذل واخـوف
من اهل الهروج مكثريـن النقانيـق
كم واحدٍ لوكـان ماهـوب مكلـوف
يطقهـا لـو جنبـت عنـه بلحيـق
ترى التعب في راحة النفس مخلوف
شوف العيون يزود النفس تشويـق
هذا ويا من له نحا البـال ملهـوف
شوفك يسليني عن الهـم والضيـق
ليتك تصافحنـي بذرعـان وكتـوف
والا علـي تدنـق الـراس تدنيـقٍ