صدري فضا ياصَحْبي وْناسي=صدري فضا..لو ضاقت انفاسي
وهمّي عليه مْوصّي ضلوعي=حدّه فقط..من (قلبي- لـْراسي)
واليا نطق مانطّق لْساني=وسيلته حبري وقرطاسي
يقرا تفاصيله ويفهمها=من يمزج احساسه مع احساسي
ويقرا تفاصيلي ويفهمني=منهو عماسه يشبه عْماسي
مافاض غيضي منْه لكنّي=لا دكّ صدري فاض هوجاسي
علّمت شعري قيمة شعوري=وعلّمني احفظ قدر كرّاسي
وان غاب وجه اللي يواسيني=يلقاني اللي شفّه مْواسي
كذا تعلّمت استر جروحي=واظفر بشيمة صبري وباسي
وانا اكثر جروحي توصّلني=لوّ اتبع خْطاها ..لجلّاسي
لكنّهم ومْن اجل عشرتهم=صرت (ا)لْهم ( المتذكّر/الناسي )