قبل فترتن من الزمن
مدري كنا في يوم سبت أو أحد ؟
( الشاهد والحاضر الناضرإنه من زمن راح )
مرني واحد من الشباب في البيت
وطلعت معه للإستراحه
الوضع بالإستراحه عادي ودجه :
ناس تلعب بلوت , ناس تلعب بلايستيشن , ناس تنصب على بعض
( وأنا كنت اضيع بينهم مره بلوت ومره بلايستيشن ومره نصب )
الساعه 11 تقريباً
قلت لخويي اللي جيت معه : عطني مفتاح سيارتك
بطلع ملابسي من المغسله وارجع
قال: أجل عطنا معك عشا
قبل أطلع شبكت جوالي بالشاحن عندهم
لأنه كان بطاريه منخفضه
المهم
ركبت سيارة خويي
وكانت كامري 2008ليموزين
طلعت ملابسي من المغسله
ومريت المطعم وأخذت للعيال عشاء ( 3 حبات مع الرز )
يوم ركبت السياره
ويجي واحد ويفك الباب ويركب
(
سكران وريحة الشراب فاقعه معه )
قلت: انزل يبو الشباب ماني سواق ليموزين
قال: ذا ليموزين
قلت: ادري انه ليموزين بس ماني سواق ليموزين
انزل واللي يرحم والدينك , ترا ماني رايق لك
المهم
وهالسكران يجلس يرفع في ثيابه
وسط السياره
وأنا جالس أطالع فيه بنص عين
( أنتظره يطلع لع سكين عشان اصفقه كف )
مادريت إلا الرجال يوم طلع مسدس
والسكران الخبل يحط المسدس
عند أذني اليمين
قال: هذا ليموزين والا لا ؟
قلت : شركة ليموزينات لعيونك , بس تعوذ من إبليس
قال: تحرك أمش
وأنا أدق ريوس وأجلس أسوق
بهالسكران المسلح
قلت: ياشيخ وين تبي تروح
عشان أوصلك
قال: ودني غزهـ
قلت : وش ذا حي جديد في الرياض ؟.
أول مره اسمع فيه ؟
قال: غزه غزه اللي في فلسطين
رح لها
( هذي والله البلشه في هالسكران , كيف أوديه غزه )
خطرت في بالي فكره داجه
أوديه لتشليح النظيم للسيارات , وأخليه يشوف السيارات المصدومه
والمحترقه , وكوم السيارات اللي فوق بعض
وأقوله : ذي غزه شف أثار القصف عليها
وأنزله وسط التشليح وأتركه
مسكت خط الحمزه في حي النسيم
وطلعت على طريق خريص
وكنت ماسك خط الخدمه
طلعت لي مصيبه جديده :
قدامنا نقطة تفتيش
قلت: ياولد دس مسدسك قدامنا نقطة تفتيش
قال: قوات إسرائيليه , إذا وصلناهم
بذبح لي منهم عسكري
( يالليل أم ذا السكران الفاقد
اللي بيورطني مع الحكومه )
قلت: ياولد اركد شوي
قال: والله لأذبحك يالعميل الخائن
قلت: وقف وقف وقف , خلاص خلاص
ذولا عسكر إسرائيلين ,
قال: بذبحهم
المهم
وقفنا عند نقطة التفتيش
وكان قبلنا سيارتين و اقفات قدامنا
( وأنا كل تفكيري ذا السكران اللي معي
مايجيب العيد ويذبح له عسكري وأتورط فيهم )
قلت: يا أخي حرام اثنين مثلنا يموتون
على يد جنود إسرائيلين ؟
قال : عادي , أهم شي نذبحهم
قلت: حنا حلم الأمه الإسلاميه ,
لو نموت ضاعت فلسطين , وبالذات أنت
قال: أنا حلم أمه .؟
قلت: ياولد أنت خليفة المسلمين وإمامهم
وحرام تموت في نقطة تفتيش
قال : وش دراك ؟
قلت : يا أخي مره رحت لساحر
وعلمني ان خليفة المسلمين بيجيني بمسدس
ويركب معي بليموزين , وعلمني بخطه
تخليه يدمر إسرائيل
عاد هالسكران صدق إنه خليفة المسلمين
وإمامهم واقتنع إنه يمسك نفسه , ولا يسوي شي
وأنا كنت أنتظر العسكري يوقفني
ويطلب الرخصه والإستماره
عشان انزل من السياره واعلمهم يمسكون هالفاقد
المصيبه
يوم وصلت عند العسكر حقين التفتيش
قالو: تفضل ياطويل العمر
( يالليل أم هالليله المنحوسه )
يوم تعدينا نقطة التفتيش
وهالسكران يرجع ويحط المسدس عند أذني اليمين
قال : وش خطة الساحر حقك
اللي بتخليني أدمر إسرائيل ؟
قلت: إي ساحر يبو الشباب
>> نسيت حبل الكذب قصير
قال: ساحرك اللي قبل شوي تقول عنه
قلت : إيه إيه تذكرت
وعطيته خطه خربوطيه من راسي
كانت خطتي كالأتي /
لازم نوحد الجزيره العربيه تحت رايه واحده
عشان نقدر ندمر إسرائيل
نروح للحدود السعوديه القطريه وندخل بعير
وسط قطر , في اليوم الثاني نرسل الجيش للقطر
بحجة إننا ندور بعيرنا الضايع ,
ونستغل هالنقطه ويتوزع الجيش كله في قطر
ونعلن سقوط الحكم وقيام عهد جديد
ونفس هالشي ينطبق على الكويت وعمان والإمارات
قال السكران : خطه محبوكه 100 %
قلت: بس فيه مشكله ؟
البحرين بيشوفون البعير وهو فوق الجسر
ولا راح يقدر يدخل؟
قال : مو مشكله نعلمه السباحه
ونحذفه بالبحر
( أبو جو جوك ياشيخ )
المهم
جلست اتناقش أنا وهالسكران بالخطه
اللي بتوحد الجزيره العربيه
بعدين خشيت بعينه عرض
وقلت: خلني أنزلك في بيتكم
وبكره الصبح أمرك ونكمل تخطيط
( أبي الفكه منه الله يقلعه )
قال : معصي انزل من عندك , رح نبي
نسرق لنا بعير عشان نخليه يدخل قطر
وبكره نقلب الحكم
حاولت الحس مخ هالخبل
بس سكران ماعنده مخ ينلحس
حاط مسدسه عند أذني ويحلف إننا لنسرق بعير
رحنا للجنادريه ودخلنا وسط شبوك الأبل
وجالس يقولي لف يمين , خش يسار
والكامري راحت فيها كل شوي وبطنها
حاك في شي
أخر شي
وقفنا عند شبك
قال: تشوف هالبعير نبي نسرقه
قلت : قدام ياخليفة المسلمين .
بس أنزل اسرقه انت وأنا بنتظرك
عشان على طول نحطه في شنطة الكامري
وننحاش
( مافيه بعير يدخل بشنطة كامري ., بس أعطيه على جوه )
قال: تبي تلعب علي , وش يضمن لي
إنك ماتنحاش بالبعير وتخليني
( أبو الذكاء اللي عنده ذا الدرج )
جلس يهددني بالمسدس
لين نزلت معه وسط الشبك
عاد يوم دخلنا الشبك
عشان نسرق البعير
أبو الشباب شم ريحة الأبل
وأعجبه الوضع ومسكت غلط
قرر إننا ننام وسط الشبك
قلت: ياولد صاحي أنت , حرامي
وتبي تنام في شبوك خلق الله
قال: أنسدح انسدح بس
عاد أنا تورطت فيه هو ومسدسه
وأنا أخذ وضع الإنسداح وهو يربط يدي
بالشماغ , ورجولي بعقال البعير
( عقال البعير = حباله )
يوم ربطني وخلص
وهو ينسدح جنبي وينام
وطول الليل وهو يشاخر هالسكران
وأنا أحاول أفك نفسي ماقدرت
أخر شي
تعبت وقررت أنام
ماحسيت
إلا والشمس طالعه ( صحيت من النوم )
وفيه 3 سودانيه يصحون هالسكران
يوم صحى
ويطالع فيني بنص عين
قال: ذا من اللي مربطه , لا يكون حرامي
قلت: ياولد انت فاقد البارح وخطفتني
أنا وليموزيني ومربطني هنا , وبتحطني حرامي
ويرجع يطالع بالسودانيه بنص عين
قال: هذا وش قصته من جابه هنا ؟
علقوه على الحنفيه .
قلت: ياولد أنت فاقد البارح
وجيتني عند مطعم في حي السلي
وقلت تبي تروح غزهـ ... إلخ
وجلست أفهم ذا الدبشه هو والسودانيه
لين أخر شي رضى يقتنع
أبو الشباب طلع الشبك حق الأبل حق أبوه
ومتعود ينام فيه
وطاحت براسي أنا
فكوني و ركبت الليموزين ورجعت للإستراحه
ونزلت العشا
يوم دخلت ماحصلت غير خويي
راعي الليموزين
قلت: وين العيال ؟
قال: أنت وين رحت
قلت: العشا اللي معي من بياكله الحين
قال: عشا الساعه 10 الصبح؟
قلت : أجل خلها فطور ياحلو
كهكهكهكهكهكهكه
أش رايكم دجه لاتصدقون
بايخه صوح
هالباقي تلقونه بقسم أستراحة ألاعضاء والفضفضه والخرفشه قابلونا هنياك
s;vhk
05-20-2010, 03:52 PM
سكران
تعليمات المشاركة
المواضيع المتشابهه
