السلام عليكم ورحمة لله
اهلا بكم من جديد في الجزء الثاني وإن شاء لله يحوز على رضاكم
أول شي الصور منوعه من كمره كانون والجوال ولكن الجوال أكثر كمرة كانون الصرحه كانت المقاطع والصور خاصه
بس الموجود إن شاء لله يعجبكم

نكمل الرحله من العاصمه
قبل ابداالصراحه فيه موضوع اثار استغرابي وسألت عنه بس مافيه اجابه مقنعه
ولينغتون ولا ولينجتون فيه اختلاف في الاسم في الكتابه وفي النطق يحذف حرف الغين وحرف الجيم ويستبدل بحرف القاف
وكذالك كريست شيرج او كرايست شيرش او تيرش وغيرها او كوينستاون او كوينزتاون السبب الله أعلم مدري من الحروف الانجليزيه ناقصه او من اللغه العربيه
وليغتون جوها بارد وممطر يعني الشمس نادر تطلع عندهم سبحان لله يفرحون اذ شافو الشمس وفيها رياح قويه وكان وقتي اللي جيت فيه شهر 5 دخول فصل الشتاء عندهم عكسنا بالتمام ومثل ماقلتلكم قبل عدد السعوديين فيها قليل أنا اول ماجيت عندهم عرفو
حتى يجوني في بعض الاماكن ناس ويسلمون علي وانا ماقد شفتهم يقولون انت اخو فلان جانا خبر انك جيت دليل على ترابطهم مع بعض وهم بالصراحه هناك كلهم مثل الاخوان وهاذا شي طيب
وشعب نيوزلندا يحب النظام ويطبقه أقدر اقول مائه بالمائه في كل شي انا بالصراحه ماشفت ولا حادث مروري في نيوزلندا كلها ولو حتى تصادم خفيف طبعا عندهم النظام صارم ولا فيه واسطه ولا بخشيش نظام يمشي على الجميع كبيرهم وصغيرهم
التدخين عندهم في اماكن محدوده ولا عليك غرامه 5000 دولار تدفعها اجباري اتركم مع





























هذا ولله مدري وشهو قاهرني ودي اشوته برجلي كل مارحت وجيت للشقه قدامي على الطريق مدري حاطينه ليش ووش يعني








اذكر مره وأنا أمشي فالشارع وسط المدينه اتمنى القى اي عربي ابي اسولف معه ونا ماشي الا تكسي واقف وأسمع اصواتهم وعرفت انهم عرب سلمت عليهم جاء واحد منهم أحسبه سوداني وطلع صومالي قال من وين من السعوديه قلتله ولله من نجد قال من وين أنا اعرف نجد كلها اثار استغرابي قلت من الدوادمي وهو يطير فيني قال بصوت عالي عتيبه قلت نعم قال ياخي انا لي 20 سنه فى السعوديه وكنت شغال فى البجاديه قلت وش جابك هنا قال ولله عشان عيالي يدرسون وجيت عشانهم ومن الاشياء الغريبه
ركبت مره مع تكسي تسوقه امراه عرفت اني من السعوديه وانا زي ماقلتلكم في الجزء الاول وبلاش فضايح المهم قامت تتكلم عن السعوديه تقول المراه عندكم ممنوع تسوق ليش في قطر والكويت تسوق وانا ارد عليها شي عربي وشي انجليزي قالت السعوديه راح تسوق قريب طبعا انا فهمتها بس من لغة الاشاره قلت نو نو نو وانا في نفسي اقول ولله ماهي بعيده





في ولينغتون اتفقنا حنا والشباب نروح رحله وكان وقت أجازه وأنا كنت الح عليهم وين نروح الشمال ولا الجنوب اتفقنا على الجزيره الجنوبيه حسبناها وسوينا قطيه تقريبا من 600 دولار وكان عددنا 11 من ولينغتون وواحد من كرايست شيرش المجموع 12 سوينا الحجوزات كلها عن طريق النت اللي هي العباره والسياره طلعنا حنا الصباح على العباره وكنا 5 والبقيه بيلحقونا بعد الظهر الرحله الثانيه والوعد في بيكتون اخذنا بعض العزبه معنا والباقي مع الشباب من ذبيحه وقدر ضغط وكل اغراض الرحله









العباره 5 نجوم وكبيره جدا تشيل قاطرات وسيارات







الشباب مدمنين بلوت في كل مكان وطقيناها اربعه وقامو يطالعون فينا بااستغراب يحسبونا نلعب قمار هههههه الرحله تقريبا 3 ساعات عبر مضيق كوك من الجزيره الشماليه للجنوبيه ولا فيه طريق غير المضيق وعبر العباره

بيكتون

بيكتون مدينه جميله وجوها كان رائع يعني لابارد ولا حار















استلمنا السياره باص وكان سوقنا الرويلي

















هاذي أول واخر نخله شفتها في نيوزلندا











وصلو اخويانا الباقين تقريبا قبل المغرب وبعد شلنا عزبتنا وشناطنا حركنا بعد المغرب الى كرايست شيرش
وحنا فى الطريق كانت الارانب تقطع علينا الخط شي يدعس وشي يعدي



كرايست شيرش

وصلنا كرايست شيرش الساعه 1فى الليل كرايست شيرج هي اللي ضرب الزلازل حتى اثاره باقيه بعض البيوت متصدعه وكنائس مدمره
وحنا رايحين ناخذ خوينا ماندري وينه بالضبط وسط المدينه شغلنا خدمة الخراط علىالاي فون جيبي اس الصراحه اذهلنا ووصلنا ودلنا الطريق الصحيح الين وصلنا بيته بالصراحه انصحكم في الاي فون جهاز يستاهل حتى طاح من احد الشباب فى النهر وشغله بعد ساعه ولا صار فيه اي شي اشتروه على مسؤليتي ههههههههه يمكن شركة ابل يعطوني هديه ولا شيا
وحركنا بعد اخذنا خوينا من كرايست شيرج وأعتمدنا في طريقنا على الله ثم الاي فون

كوينستاون

كويننستاون سميت على ملكة بريطانيا



وصلناها 7 الصبح كان الطريق طويل ووعر مثل طريق كرى والمسافه طويله من اول الجزيره الى اخرها تقريبا كوينستاون طبعا كنا تعبانين أستأجرنا شقتين







































هاذي الصوره من اعلى شي وكان منظر مخيف على العربه تركبها بعد التلفريك



سباق السيارات لعبه جميله لكن مخيفه وخطره ماتركبها الا بعد اختبار وهي مرحلتين الثانيه صعبه وخطيره









هاذي من اخطر الالعاب فى العالم لعبها واحد من العيال ولله وصلنا الشقه ورجلينه تنتفض



وبعد كوينستاون رجعنا الى كرايست شيرش






وهناك التقينا في جاسم البدراني عراقي عايش في الكويت رجل طيب وحبوب وهو معروف في كرايست شيرش وخص عند العتبان هناك تقابلنا عند المسجد اظن الوحيد في كرايست وطلعنا كلنا سوء بعد كملنا باقي اغراضنا من كرايست شيرش
للمزرعه وصلنا المزرعه وجاب لنا 4 بنادق صيد 2 شوزن و2 ساكتون بتصريح واول ماجينا على طول قنص هههههههههه ماعندنا وقت وكانت المزرعه مليانه ارانب وطيور وكل شي حتى الظبى موجوده بس بعيد شوي وكان الوقت ضيق كنا نسوي العشاء كبسه وشوي وقصدير يعني لحم ذبيحه وارانب وطيور ماندري وش ناكل




















أحد الشباب ولله مدري وش يرمي








هذا جويبنا اللي نغزيبه تالي الليل على الارانب

المزرعه كانت اجمل مافي رحلتنا الصور كثيره لكن للأسف الصور ماوصلت وتأخرت ولا فيه مقاطع للقنص فيديو وصور

اتركم مع مقاطع الفيديو وهي مجموعة مقاطع مدموجه من الجوال وهي على صيغة HD يعني اللي يحب يشوفها بعالي الجوده يختار الصيغه من اليوتيوب
واللي اتصاله على كنكت ينحاش يخليها على وضع 360








نيوزلندا بلد سياحي جميل ولكن ليش السياحه فيه نادر او قليه انا ماشفت ولا سايح كلهم يدرسون
السبب البعد والغلا يعني مافيه شي رخيص عندهم كل شي غالي انا ماقهرني غير حاجه ماهوب دبل وبس الا معطينها قهوه
سعرها فى السعوديه ب 7 وعندهم 58 سببت لي ازمه اقتصاديه ولا احد يسألني وشهي
اتمنى ان رحلتي تحوز على رضاكم وانتظروني في الجزء الثالث ههههههه صار باب الحاره انتظروني إن شاء لله في رحلات قادمه

المصدر: منتديات شبكة قبيلة الغنانيم الرسمية