اروح بيبسي بدون غازات - منتديات شبكة قبيلة الغنانيم الرسمية

09-26-2012, 12:49 AM

هواوي داج

كاتب مبدع

تاريخ التسجيل: Nov 2009

الدولة: على احد الطرق السريعه

العمر: 42

المشاركات: 920

معدل تقييم المستوى: 16

اروح بيبسي بدون غازات

نبا نغير الجو اروح بيبسي بدون غازات

السلام علاكم وشلونكم وكيف حالكم
وعساكم بخار والف نعمه
هالحين ابا اجيب لكم هرجه والهرجه
هاذي ترى ماهو انا الي قايلها
بس انا عند الضروره انقح واشقح فيها
ولايجيني واحد يتزروا عشان برابري
تراني انا غليم بري ووديع
واحب ماماه وباباه الله يرحم باباه
ويخليلي ماماه ياربي, وترى هاذي
هروج مهيب قصيده شعر لها نقادها
ومنقودها ونعتذر عن لاسهاب والاجحاف
في المقدمة لاسباب امنيه مشدده
طرّاه الشرطه والداخلية هاذي الأيام تقفّط في
ذا المارقين على طاري المارقين
اول مرتن سمعت كلمة المارقين
سالت صديقي المدروه ..وش معنى المارقين ؟
قال : المارقين يعني اللي يفطرون
مرق ويتغدون مرق ويتعشون
مرق <<( المشكله مشت علي كم فتره
الين جاء يوم وعزمني واحدن على الفطور
يوم شفت المرق قلت له : ماشاء الله اليوم
صايرن مارق وانا مسوي فاهم ! ..
الرجال طارت بوهته وبغى يطردني من بيته
بس يوم شاف على وجهي ابتسامة بلهاء
عرف ان مافي الحمض أحد واني ملعوب علي ).
طيب كلكم مرت علاكم ايام الطفوله
غار انا مستمر فيها و ايام كنا نلعب حراميه
وشرط واضربني والحقك وعريس وعروسه ..
ومن فيكم ما لعب غميضه << على طاري هاذي اللعبة لعبتها
مرتن مع بنت خالت جدتي الي ماني قايل اسمها
والي يومكم هذا وهي متوزيه ما بعد لقيناها
( شكلها جنيه تعرف توزاا )
الله يخلف على اهلنا بس يحسبون في روسنا مخ
ما درو ان هاذا المخ حول مع الزكام وراح في منديل كلينكس.
طبعاً قصتي مع بطه كقصة روميو وجوليت
وماهو روميو وجوليت
بالنسبه ليوالى بطه بنت ابو بطه بل اكثر من قيس وليلى
على طاري قيس وليلى ترى فيه عرس بنغاليه
في حارتنا باتسر والدعوة عامة
كانت بداية قصتي حسب توقيت منطقة الرياض في ( ذات قايله )
كنت جالسا عند الباب ومعاي الكوره وماغير اصمخ بالكورة في الجدار
وما خليت امي تقيّل .. جاء اخوي معصب وياخذ الكوره ويشوتهاا
بقوة امه و ابوه ولاه مسطحها في بيت جيراننا
ثم التفت علي و ييمعطني كف وشلوتي دبل كيك
زي دبل سعيد العويران (لزوم اللون اللي اشجعه)
ولاني متسطح في منارة مسجدنا
( اشوى اننا في ديرة اسلام والا لو اننا في ديرة مسيحيين
كان صاك راسي في جرس الكنيسه ) .
الا على طاري الكنيسة ما تحسون ان
ذولا المسيحيين خبول خخخخخخ
اجل فيه احد ينادي للصلاة بجرس
( تهقون لو يسكن مسيحي جنب مدرسه
بيقعد يطامر كل شوي يصلي )
خخخخخخ هذا والله الدين الاقشر كنه ينتظر حصة رياضات
المهم نزلت من منارة مسجدنا ورحت لبيت جيراننا
عشان اجيب كورتي صورة كورة جلد طالعن لستكها
مع فتحه صغيره تسنّه خشة يماني مخزن قات
.واروح ابي اطق على جيراننا ابي الكوره يوم وصلت
الا يغسلوون حوشهم توهم ساكنين
( صوت الدينمو يدهّر والشارع رطرطه وبزارينهم لهم صجة
شكلهم قالبين الحوش ملعب صابوني )
ولاني مؤدب ما سويت شي ابد .. بس وااايقت من تحت الباب
اشوف وش يغسلون ( وجه برئ مرررررره )
وانا اطل من تحت الباب واشوف موجة تسونامي
مقبلتن علي ( شكل شغالتهم نشيطة .
عليها تشطيف بلاط يروع )
ما امداني ارفع راسي الا والماء داخلن في خشمي.
ياشينها عاد اذا قالو اهل الحارة اني غارق في عتبة
باب جيرانا رفعت راسي وانا اكالخ وعيوني
حمر وخشمي يسرب ماء وصابون
والقى جنبي شماغ واسحبه امش به خشمي ..
على طاري الشماغ والخشم ترى الشماغ له عدة وظائف
منها انه منديل وفوطه وتقدر تعقد طرفه على شان
لا تنسى وش موصينك اهلك .
سحبت الشماغ ومشيت خشمي
وفجاة لقيت واحد لاقطني مع رقبتي يقول وش
عندك تناظر من تحت الباب
قلت : لا ابد بس ادور كورتي وقعت عند جيرننا
( تصدقون اني قايل "وقعت" من الراعه )
شكلها كانت اقرب كلمة في مخي
عقب الغرقه قال: وقال وقعت كورتك هاه
( وفي لمح البــصر يجيني ذاك الكف اللي ماعمري
اكلت مثله حتى من ابوي الله يرحمه)
في ذيك القايله الله لايعودها كلها راحت كفوف .
وضف وجهك مافي كورة...
لا اقلب وجهك الحين بلاطه ثلاثين في ثلاثين
قلت : والي يخليك يا علك تزوج اليوم قبل بكرا
ماعاد ادري وش اقول ويقوم ويصكني بكف ثاني
ولاسنوني تقرقع في بطني
( بعدين عرفت ان اهله يعيرونه العلك )
عشان كذا ابدع فيه
ويوم شافني متبرع بوجهي للكفوف ولا ارد عليه
ولا اهوش ولا ادافع عن نفسي
حقرني ودخل بيتهم ومن زود الحقران ما صك الباب
واجلس استرق النــظر الا ذيك البنت اللي مطلعتن
كراعينها وكاشفتن عن ركبها السود اروح بيبسي بدون غازات

تغسل الحووش >> انا هنا راح قلبي رحت وطي
رحت بيض مقلي بدون ملح رحت بطاطس
بدون كاتشب يالبي منو هذي وانا استرق النظر
<< اتعب مع اللغه العربيه ناظرت لي ويوم
حطيت عيني بعينها نسيت العالم حسيت
اني في لبنان <<< هاذا السطر مخليه لعانه
عشان تعرفون مستوى الزحفان من قبل ومن بعد اروح بيبسي بدون غازات

وقربت قالت : انت وش عندك هنا ؟
( يا ويل قلبي انا اروح وطي و اروح بيبسي
بدون غازات و اروح مريسة تمره
مع الدراعه الخضرا والزنوبه الفوووشي )
جيت بتكلم تلعثمت وتلعثمت ثم قلت
اااااا ابي ابي اااا << اشوى ان ابوي مهوب حولي
والا كان يرد علي ويقول وش تبي وانا ابوك
وقبل لا اقول ابي كورتي ويجي اخوها ومعه الكورة مشقوقه
تسنها كرشة خروف مصيبه ابو رمح الا ابو رمح يصيب
الخروف والا المعزا اروح بيبسي بدون غازات

...واخذ كورتي واناظر بطه نظرة
الم واعجاب وحسره وسعاده وملح ناعم وملعقه صغيره كمون.
وصلت البيت وانا ضايق صدري وكورتي مشقوقه ..
وارقى للسطح اقعد عند عشة الحمام واسولف معهن
عن فتنة الحوش وساحره البلاط
ام عكاريش بطه . ما علمت وحلمت الا ذيك
الرضمه تصفق ظهري اروح بيبسي بدون غازات

الرضمه يعني الحصاه اي الحجره او الصخره
( اي اي اي وش ذا من يضرب )
التفت وراي واشوف حنس اخو بطه في وسط الشارع
يصارخ علي وش عندك تناظر لحوشنا
ياقليل الادب ويصكني مع راسي ولا راسي منشلخ
تسنّه ثعبة بريق( حسبي الله عليك ياسلومي خربت اجازتي
ووهقتني مع ذا الأطيرم )
تبون الصدق عاد.. والله انه ما ينلام ومن حقه يفلقني
دامي ما راعيت حقوق الجار
وسمحت لنفسي اني استرق النظر لاخته
بس ترى قسم بالله اني ما رقيت للسطح عشان اطل على بيتهم
( وش فيكم ما صدقتوني ؟)
اصلا ابوي مربيني اني احترم الجار واعتبر بنت الجيران
زي اختي( يعني لو تقول لي بنت الجيران
جب لي من المكتبه مقلمه او دفتر
اقول اطلبي الله ) هذا والله الأخو النشبه
صح اني استرقت النظر بس عشانها مطلعه
كراعينها ( صعبه بعد افوّت ذا الفرصه منظر مفزع اروح بيبسي بدون غازات

قصدي خلاب)
حتى سعد الحارثي يوم ضيّع ذيك الفرصه عوضها في فرصه ثانيه
خخخخ حولت من السطح ويدي على راسي والدم يصبصب على خشتي
تسنّي قطو صادمن في جدار وتقابلني امي وتقعد تسمي علي
يوم سمعتها وهي تسمي وادنها بتسوه
( ترى بعض الأمهات تخرب طبع ولدها بدل ما تشجعه على الصبر
وتحسسه ان ذا الأمور هينه وممكن تصير في اي وقت .
تقعد تسمي عليه وتخمخمخه الين يصير انعم من اخواته
ويصير يبتسي على ادنى شي ) يوم شافتني امي
ابتسي وهي تستفزع بااخوي
واخوي يلبس لباس الحرب ويفرك وجه بسنو
ويقعد يخطط تحت عيونه ويعلن الحرب
على جارنا . واول حادي بادي قادي قام ولقطني
بيدي وراح بي لبيت الجيران
عشان يثبت لابوهم انهم هم البادين . يوم رن الجرس عليهم
و اسمع صوت بطه وهي تقول : طيب ياللي عند الباب .
( صوت صرقعه الزنوبه مع بلاط الحوش والماء تسنّه مصرية تاكل علك )
يوم واقت مع الباب وشافتني وانا مفلوق وعيونها
تمتلي دموع وتقول :يا حرااام من ذا اللي
فتح في راسك فرع للراجحي .
قلت لها : هذا اخوك وما سوا ( عليه من الله ما يستحق )
ردت بطه الباب وراحت تركض تنادي
ابوها وابوها كان عاقل وطيب
ويعرف ان ولده اقشر جاء وطلع لنا
ولزّم على اخوي يقلط ويتعوذ من بليس
وياخذ فنجال ووعده انه يأدب حنس بنفسه
والله ونقلط وناخذ فنجال قهوة
ويروح ويجيب معه ولده حنس ويسدحه
عند رجلين اخوي قال :
هذا حنس تحت رجلك ان بغيت تضحي به ضح به
بس تراه ما يجزي عن الأضحية
عشانه ردي وانت خابر حكم المترديه والنطيحه
وما أكل السبع .والظاهر ان جارنا
شيخ افتاء في منتدى محو الأميه
ضحك اخوي وقال اثرهم صادقين يوم يقولون الجار
قبل الدار يابو حنس قم يا حنس
انطلق الي اهلك فقد عفوت عنك وفي ذا اللحظة
سمعت صوت بطه من وراء الباب وهي تقول :
وهــ بس ما ادري انا افرح بالعفو عن اخوي والا افرح بروح الجيران
اللي ما عاد لها ذكر في ذا الوقت والا بيوم الاستقلال.
وتشكراتي لشيوخ العشيره والربع
والي يقرون والي مايقرون بس يفنقلون عينيهم

المصدر: منتديات شبكة قبيلة الغنانيم الرسمية

hv,p fdfsd f],k yh.hj

__________________

http://www.youtube.com/watch?feature...&v=BK93goMOU_E
دروب الحي تســألني
ترى هل سافرت ليلى
وطيب الشوق يحملني
إلى عيــنيــك يا لـيلى

09-26-2012, 01:12 AM

ابو رامي

كاتب ماسي

تاريخ التسجيل: Nov 2010

المشاركات: 4,287

معدل تقييم المستوى: 18

الهواوي تصدق انك ملح وبهارات وكتشب وبصل هالمنتدى< راحت طبخه ماهي اطراء هههههههههههه
المهم موضوعك جميل وانت اجمل الله يعطيك العافيه

__________________

منتديات قبيلة الغنانيم

09-26-2012, 01:21 AM

نوح فايح الغنامي

كاتب ذهبي

تاريخ التسجيل: Mar 2011

المشاركات: 2,814

معدل تقييم المستوى: 16

نوح فايح الغنامي is on a distinguished road

الاخ هوادي داج لحست مخي بهذي المعّلقه ههههههههههههه

__________________
سبحان الله وبحمده سبحان الله العظيم

09-26-2012, 01:27 AM

ياسر العضياني

تاريخ التسجيل: Jul 2012

المشاركات: 212

معدل تقييم المستوى: 13

ياسر العضياني is on a distinguished road

ههههههههههههه

الله يسعدك يالهواوي
ماقصرت ومثلت خير مثال للجيره

ههههههههههه

طرح في منتهى الجمال وإسلوب فكاهي لا يجيده الكثير

تحيآتي العآبقة بالمسك وروائح الأوركيدآ لشخصك الكريم

__________________

09-26-2012, 01:49 AM

الحنونه

كاتب ماسي

تاريخ التسجيل: Apr 2010

المشاركات: 4,485

معدل تقييم المستوى: 19

اهلاً و سهلاً
من طــــــــــــــــــــــــــــــول الغيبات جــــــــــــــــــاب الغنائم...

طرح في قمــــــــــــــــــــــــة الروووعة..

شكــــــــــــــــــــــــــــراً

__________________

09-26-2012, 02:00 AM

المستلبد

كاتب متميز

تاريخ التسجيل: Sep 2011

الدولة: في خط الاستواء الجاف وسط الصبخاء

المشاركات: 460

معدل تقييم المستوى: 14

هههههه تستاهل ازين كل مره اقول لك انت سطح الكوره وانا اجيبها وعلشان نيتك رديه جاتك فلقه تمشي ميتين وامتلا خشمك من الصابون ههههه ولو اني مكانك هديت صندقة الحمام عليه وهو يصيح في الشارع فالحرب في صالحك انت فوق وهو تحت بس انت اخلاقك عاليه ماودك تذي احد الله يكتبلك الاجر

__________________

منتديات قبيلة الغنانيم

09-26-2012, 06:31 PM

مبارك حمد الغنامي

كاتب مبدع

تاريخ التسجيل: May 2008

المشاركات: 843

معدل تقييم المستوى: 17

مبارك حمد الغنامي is on a distinguished road

هواوي في ذمتي اني ماعمري قريت لك موضوع كامل لأني يصيبني حمّى في نص الموضوع واوقف واعبي بنزين واروح المستشفى واتقهوى لي مع ريجيل في نص موضوعك

حسبي الله ونعم الوكيل على ابليسك
حسبي الله ونعم الوكيل على ابليسك
حسبي الله ونعم الوكيل على ابليسك
حسبي الله ونعم الوكيل على ابليسك
حسبي الله ونعم الوكيل على ابليسك
حسبي الله ونعم الوكيل على ابليسك

__________________

منتديات قبيلة الغنانيم

09-26-2012, 11:52 PM

غيوم نجد

كاتب ذهبي

تاريخ التسجيل: Mar 2011

المشاركات: 2,445

معدل تقييم المستوى: 16

كل الشكر لك ولطروحاتك الرائعه

تقبل احترامي وتقديري

__________________

350 × 233 - 37dc.net

09-27-2012, 12:01 AM

المشعاب

كاتب مبدع

تاريخ التسجيل: Dec 2011

المشاركات: 745

معدل تقييم المستوى: 13

هههههه الله يرجك يداج والله انك تسلي الطفشان
ليس ماتجي في الفضفضه يومي
لزوم تدخل وش الي ملهيك عنا
هههههههه

__________________

منتديات قبيلة الغنانيم

09-29-2012, 11:03 PM

#10

الجنه مبتغايه

تاريخ التسجيل: May 2011

المشاركات: 128

معدل تقييم المستوى: 14

الجنه مبتغايه is on a distinguished road

\\مبدع فكاهي رائع تقديري واحترامي استاذ هواوي\\

__________________

أدوات الموضوع	إبحث في الموضوع
عرض نسخة صالحة للطباعة أرسل هذا الموضوع إلى صديق	إبحث في الموضوع: البحث المتقدم

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شعر محشش مضحكـ جداا	مع نفسك حبيبي	الــصــيـوان واستراحة الأعضاء.	3	11-11-2011 03:14 AM
طريقة اكتشاف الفيروس بدون برامح وطريقة مسح الفيروس بدون برامح عن تجربة	يـزيـد الـقـبـوري	منتدى الحواسيب والاتصالات	9	06-24-2011 07:50 PM
اكمل الكلمه بدون نقاط	مخاوي الذيب	الــصــيـوان واستراحة الأعضاء.	21	12-07-2010 01:26 PM
قصيدة محشش	فيصل العتيبي	الــصــيـوان واستراحة الأعضاء.	3	11-10-2010 08:05 PM

		منتديات شبكة قبيلة الغنانيم الرسمية > الأقسام العامة > الــصــيـوان واستراحة الأعضاء.
اروح بيبسي بدون غازات

اسم العضو		حفظ البيانات؟
كلمة المرور

تعليمات المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code is متاحة الابتسامات متاحة كود [IMG] متاحة كود HTML معطلة Forum Rules