هذه القصيدة للشاعر علي محارب الغنامي
يسندها على سعد بن براك الغنامي
يا لله يا مطلق قيود المساجين
يا واحداً ما غيرك احد رجيته
انك تقدرني على المنطق الزين
وانك تيسر دربي اللي نويته
البارحة يوم انتصف ليل الأثنين
سراني الهاجوس وانا سريته
نصيت ابن براك طلق الحجاجين
اللي ليا مني تضايقت جيته
متنه يشيل اللي تشيل البعارين
نجم لمع بين المخاليق صيته
بالخاطر الطيب وبالمنطق الزين
معطيه ربي ماني اللي عطيته
جيته بلا ميعاد في الوقت والحين
سقت القدم حتى وقف عند بيته
لا باغياً حاجه ولا طالبه دين
جيت بلزومٍ قدها لا نخيته
تكفى يا بو براك ولد احمر العين
انشد عن اللي غيرها ما بغيته
نبي لانا جوله من الجله وايمين
وان مر لبخه مع طريق الحويته
ديرة مطانيخ الرجال الميامين
ونا خذ لانا في لبة العرق بيته
وليا صحينا قبل صوت المواذين
ونمسك طريق مبطياً مامشيته
درب يودي يم سيد المزايين
اللي غلاها من قديم كنيته
عهدي بها في عام سبعه وتسعين
ومهما كبرنا قولها ما نسيته
قالت تراني معك في العسر واللين
ولاغيرك احداً في حياتي هويته
كلامها ينعش قلوب المحبين
رش السحاب اللي يمر البهيته
يا حي ها الطلة و يا حي هالعين
يا وجد حالي كاني مالقيته
علي بن محارب الغنامي
وقد رد عليه سعد بن براك الغنامي بهذه القصيدة
ابدى بذكر اللي خلقنا من الطين
اللي ليا ضاقت عليه دعيته
البارحة ليلي والافكار ليلين
وياما رسمت من الطروق ومحيته
اما كلام ينكتب في الدواوين
ولاعن الاقصى والادنى كميته
من شان ابو سلطان ريف المقلين
اصخر صعيب القاف حتى وليته
فدح القريم وظاهرله براهين
طيبه من الجدان ماهو نبيته
شواشة للضيف لو الدهر شين
وماتزرعه من طيب فيهم جنيته
لاباس ياشاكي فراق المضانين
جرحك قديم وصابراً ما شكيته
بعد حصلك من عشيرك عرابين
اقفيت بالقلب النظيف وجفــيتــه
صبرت لك عشرين مع درب عشرين
وزهور هاك الوقت هافــت وميته
تقدم التاريخ والناس صاحيــن
واللي على بالك تراني قريته
ما هيب ما شيت علي الهواذين
ومن قالي غير الحقيقة عصيته
كان الذهيبه فقدها قبل عامين
اتعب سعد رجله وتعب ونيته
خذني على جنبك خوين على الدين
لو قلت لي في راس شمرخ رقيته
حقايق ماهي سوالف ســفاهيــن
رفيقي الطــيب بعمري فديــته
والود ما عذرب شيوخ مسمين
حرز الجهام اللي يبعد مبيته
منهم عقاب اللي يفك المتــليــن
وابن رشيد وغيرهم ماحصيته
واليوم عصرأهل النمر والعناوين
واللي مضى ما رجعه قول ليته
سعد بن براك الغنامي
lsh[gi fdk ahuvdk