|
أقلّ من النزوح ،، بكثير ..
..
احبة هذا الصرح ،، 4 مشاركات في مشاركة واحدة تعمدت فيها النزوح قليلا الى عوالم أخرى الرابط بينها تنوع البحور فقط ،، كل ما اتمناه ان تنال اعجابكم ،، ثم سعة صدوركم لطول الموضوع :) . . . 1/ ياخليّ المشاعر وش تبي ذبلت غصوني ـــــــــــــ ادفن اللي مضى فـ ارض الوهم من ذكرياتك جيت عقب انتهينا وانتهى الحبّ الجنوني ـــــــــــــ رجْعِتِك منكسر عندي مثل لحظة وفاتك ياحسافة عقب ذيك الثقة خابت ظنوني ـــــــــــــ الوفا وين ! يا اللي دون وازع خنت ذاتك تحت جفني قنب ذيب السهر واسمرّ لوني ـــــــــــــ وانت غادي بك النسيان في لذة مباتك كل دمعٍ ذرفته في غيابك من عيوني ـــــــــــــ ماترده نهار القاك ضحكة من شفاتك ليتني ماذكرتك يوم حسيت بطعوني ـــــــــــــ كان ماهمّني ياناكر العشرة سواتك قاوم الحزن كانك تقدر بحجمه تكوني ـــــــــــــ رح عسى روْحِتِك خيره ،، قطار الحلم فاتك كل شيءٍ يهون الا الكرامة ماتهوني ـــــــــــــ قدمك اربع جهات و للوطا خامس جهاتك خلني للزمن والجرح تبريه اللحوني ـــــــــــــ انت عقب انقطع حبل الوصل حرّ بحياتك زيّ ماعشت من دونك ليالي عش بدوني ـــــــــــــ بس لاجيت تمشي من هنا خذ ذكرياتك .. .. 2/ لاتِعَاتِبْنِي خَلّ العَتَب ـــــــــ مَذْهَبِك مايشْبٍه مذْهبي هاك نسج افكاري من ذهب ـــــــــ أشعل ابْذهْنكْ بعْضٍ احطِبي هدّ من روعك لاترتكب ــــــــ ذنب ماله داعي بِسْبِبي نفعل احياناً مالا نحب ــــــــ نتبع الواقع لو مانبي لفترقنا قل عند العرب ــــــــ عين ماصلت على النبي ماخدع لكنْ شيّ انكتب ـــــــ مَذْهّبه ماهو من مَذْهَبي .. .. 3/ الهنوف اللي مع الدرب رزّت عنقها ماشية ماتلتفت ـــــــــــــــــ شامخة نظراتها للسما والموت كله بصفّ رموشها آيه من آيات ربي نشت في بيت عزّ ومن الزين اكتفت ـــــــــــــــــ من نعومتها تحس الهوى يحتار لاهبّ وين ينوشها وجد حالي يوم عنّي بغمضة عين في زحمة الناس اختفت ـــــــــــــــــ استحلت مملكة فكري وخلّت على ارضه فلول جيوشها اعترف من جدّ بان القصايد باسمها فوق الاوراق اهتفت ـــــــــــــــــ ماعليّة من شياطين خلق الله ولاشلت همّ خدوشها .. . 4/ جعل شرب القهوة الصبح ماينعاد ـــــــــــــــــــــــــ تلْفَت اعصابي وجنّني القولون ياهجوس الشعر جيتي بلا ميعاد ـــــــــــــــــــــــــ ليت ربعي عن سبب جيتك يدرون كان ما خضت بغمار البحور عناد ـــــــــــــــــــــــــ اعسف مهار القوافي على الموزون ماضريت من البداية على المعواد ـــــــــــــــــــــــــ قبل ماحقق هدف نفسي المضمون اسمعوني زين ياحضرة النقاد ـــــــــــــــــــــــــ خاتم سليمان تحت الحبر مدفون عرش بلقيس لحرس مملكتها عاد ـــــــــــــــــــــــــ افزعوا قبل العفاريت لايصحون ساحة وثلة خدم يتبعون اسياد ـــــــــــــــــــــــــ والوصية فلسفة عازف القانون يالجان الشعر ليش العدل ماساد؟ ـــــــــــــــــــــــــ ليتني شاركت في شاعر المليون ! .. .. |
أبوديــــما صح لسانك وبيض الله وجهك على هذه الدرر اللتي ليس بغريبه منك تحياتي وتقديري
|
هلابك وغلا ياصقر روق
وجهك ابيض و صح بدنك وكل الشكر لك ولمرورك المميز يانقي تحياتي واحترامي اخوك : سلطان .. |
اسمعوني زين ياحضرة النقاد
ـــــــــــــــــــــــــ خاتم سليمان تحت الحبر مدفون قصائد جزله ابوديما ابدعت صح السانك مليووووون |
اخوي سلطان مطلق الغنامي للآبداع حدود وانت قد تجآوزت تلك الحـدود بجمآل حروفك المآسيـه امتعتنآ تلك الكلمآت واسرتنآ واخذتنآ الي عالمك عآلم لآيعرفه الا المبدعون لآاجد مآقول من الكلمآت ... لآاعطيك مآتستحق فقط سأمر صامتة فلا مجال للكلام أمام عظمة حروفك دمت ودام حبر قلمك كل الشكر لك الحنونه |
صح لسانك وهذه الحروف من ذهب ؟؟!
تقبل احترامي وتقدير لكَ،،، اخوك/ سامي العتيبي... |
الهنوف اللي مع الدرب رزّت عنقها ماشية ماتلتفت
ـــــــــــــــــ شامخة نظراتها للسما والموت كله بصفّ رموشها آيه من آيات ربي نشت في بيت عزّ ومن الزين اكتفت ـــــــــــــــــ من نعومتها تحس الهوى يحتار لاهبّ وين ينوشها وجد حالي يوم عنّي بغمضة عين في زحمة الناس اختفت ـــــــــــــــــ استحلت مملكة فكري وخلّت على ارضه فلول جيوشها اعترف من جدّ بان القصايد باسمها فوق الاوراق اهتفت ـــــــــــــــــ ماعليّة من شياطين خلق الله ولاشلت همّ خدوشها .. ماذا عساي أن أقول يا ابا ديما أمام هذا التدفق الجمالي للحروف الذهبية والإبداع منقطع النظير من شخصكم الكريم. أنت علم من أعلام الشِعر في قبيلتنا ونفخر بك. لله درك من مبدع واصل وعين الله ترعاك ونحن من متابعينك أنقطعت عن حرفك في الفيس بوك ولكني هنا وجدت مايغنيني عن ماهو هناك. أزهى التحايا...... |
كما تعودنا : هنا الشعر والكلمه والاسلوب
الخـاص والابـداع الذي لا يتـقنه سواك فصح لسانك مدد بلا عدد يابو ديما متصفح غني بكل محتوياته ونشتاق له حين يغيب لمده من الزمن الله يحفظـك مودتي |
هنا يحلو الكلام عندما نرء
شاعر نراه في الاحلاام بعذ ب قصيده وروعة القائه جل احترامي لشخصك ولطرحك |
سلطان مطلق صح لسانك وبيض الله وجهك والله يعطيك العافيه
|
| +4. الساعة الآن 11:57 AM. |
Powered by vBulletin® Version 3.8.12 by vBS
Copyright ©2000 - 2025, vBulletin Solutions Inc.
جميع مايطرح في المنتدى لا يعبر بالضرورة عن رأي إدارة شبكة قبيلة الغنانيم الرسمية وإنما يعبر عن وجهة نظر كاتبه فقط