حمام ،، واشياء اخرى :)
 

أحبة البوح وزملاء الحرف ،، تجارب جديدة علّها تفي بغرض التواصل المشرف :

..

1/
الليلة بصدري حمام
ــــــــ عيّا من المغرب يطير

ياشين لعثام الكلام
ـــــــ حتى على لسان الصغير

لله دري من غلام
ـــــــ خلقت في الدنيا كبير

ذيب الخلا اللي ماينام
ـــــــ اومي له بكبد البعير

ممشاي رجلي في الظلام
ــــــ ماهمني ويش المصير !

لكن ليا اطريت الغرام
ــــــ طيرن بدون جناح اصير

يانار شبّي ،، والسلام
ـــــ حمام طيررر ولا تطيرررر !

..

2/
.
.

غنّ يافرخ الحمامة فوق غصنك
ـــــــــ حيّ ابو صوتٍ من اعماقك تجرّه

اعتبر صدري وطن والقلب حصنك
ـــــــــ عان في شريانه لخطوتك جرّه !

..

3/
.
.
هذي بقايا كحل /معزوفة الناي
ـــــــــ ترسم على روس المراقيب ظلي

استوعب المعنى وانا الرايح الجاي
ـــــــــ اروح كلي وارجع بصمت كلي !

وامّ السبيب اللي رسنها بيمناي
ــــــــ تشرح لك المضمون لحظة تجلي


..

4/


كان الوصل يابن الحلال حرام
ــــــــــ فانته بريء ولاعليك ملام

النور يسطع والظلام يزول
ــــــــــ والحب يبقى في القلوب دوام

مانيب في بعض الامور فقيه
ــــــــــ لكن سمعت من الفقيه كلام

يقول فكّر لاتصير بليد
ــــــــــ فالنار لايرميك فرخ حمام

من تغلبه نفسه يعيش ذليل
ــــــــــ تلقاه في الصعبة هزيل مقام

واللي على نفسه شديد عزوم
ــــــــــ يحتلّ بين الفرقدين مقام

خابرك ذيب وفي فضاك قنيب
ــــــــــ موحيه مرّة والعباد نيام

ما انته يابن مطلق قليل صلاح
ــــــــــ راجع ضميرك والسلام ختام

..

5/
.
.
علّ فــ ميوزك احاسيسك وعطني من قصيدك
ـــــــــــــــــــ الشعر من فمك سكّر مصدره رقّة خيالك

يا أنيق الفكر ياموهوب مشتاق لجديدك
ـــــــــــــــــــ انسكب جوّاي مثل الما تراك انته لحالك

كمّل اجوائك بريق وزد من اعجابي رصيدك
ـــــــــــــــــــ اخطف اضواء النجومية ولبسها دلالك

وانتظر يافائق الروعة رسالة في بريدك
ـــــــــــــــــــ ( لاجفاك يحلّله ربي ولاحتى وصالك )
..

عذراً على الاطالة :)

..

ذيب الخلا اللي ماينام
ـــــــ اومي له بكبد البعير
هههههههههههههههههههه
ماأروعك ايه الفكاهي
بشعرك العبقري
جل احترامي

صح لسانك وعتلى شانك يابو ديما

صح لسانك يا بو ديما وبيض الله وجهك
على هذه الدرر تحياتي وتقديري

صح لسانك ياوديما شاعر جزل
تحياتي وتقديري لك طال عمرك

اخوي سلطان مطلق مأراوع قلمك حين يصول ويجول
بين الكلمات تختار الحروف بكل أتقان ..
تصيغ لنا من الأبداع سطور تُبهر كل من ينظر إليها ..
لك اجمل عبارااات الشكر والعرفااان..



الحنونه ستبقى هنا كثيراً....:~

سلطان

لله درك يارجل

سلم منطووقك وسلم راسك

ولاخلا ولاعدم

.
.

هلابك يابرق الشمال ياعذب :)

وكل الشكر لك ولمرورك لاعدمتك

تحياتي واحترامي

اخوك : سلطان

..

.
.


صح لسانك ياسامي العتيبي

وكل الشكر لمرورك الغالي لاعدمتك

تحياتي واحترامي

اخوك : سلطان

..

.
.

هلابك وغلا يا حكيم الراي ،، وجهك ابيض وشهادة شاعر اعتز بها وافتخر جدا

فكل الشكر والتقدير لك ياراقي

تحياتي واحترامي

اخوك : سلطان

..