|
اتزوجَ شاايب اهَون لي من شاب!
السلام عليكم ورحمة الله وبركاته هدي مقوله انتشرت بين البنات وتفضل انها تتزوج شايب بحجة انه مايعقد ويدللها وعنده مال وعز ويكون عاقل الخ ؛ بعد ماكان شروط فارس الاحلام مايكبر عنها بالسن بفارق كثير سوالي للنقاش يقول ! : تتوقعو ليه البنات غيرو رايهم واتجهو لكبار السن اللي يكون فيه فارق في العمر عشر فاكثر ؟ : من تفضلين اكثر الشايب ام الشاب' وليه ؟ : من تفضل اكثر الاصغر منك بفرق او القريبه وليه للي يقول توي صغير حط مكانك في محل الشايب هل تقبل الزواج بها وليه ؟ ^ طبعا ماعميت هينا بس فيه اشخاص يايدون ذي مقوله انتشرت بين البنات وصارو يفضلو بعضهم الشايب اكثر من الشاب |
أكيد شاب وش ابي بالشايب الا اذا كان مو متزوج ممكن ..
بعض البنات اللي تفضل الشايب الغني وبعدها يموت وتورث فلوسه متأثرات بالمسلسلات وهذا تفكير مراهقات اما البنات العاقلات مثلي أنا طبعا ً تفضل الشاب وبعدين مين قال ان الشايب يدلل ؟ اساساً راح يعاملها كأنها بزر وفيه فرق بين الدلال والمعامله كالطفل ومايأخذ رأيها ولا حتى يعبرها خصوصاً اذا كان متزوج قبل لان في هاذي الحاله بتكون زوجته الأولى هي الآمره الناهيه والعاقله ......الخ وهي بتضيع ومحد بيعبرها .... وبالنسبة للشباب ألاحظ انهم يفضلون اللي اصغر منهم اقل شي بخمس سنين مدري وش الحكمه ؟يمكن عشان اذا شيب تبقى هي في عز شبابها ؟الله اعلم موضوع رائع كما عودتينا...مشكوره يا نجديه |
وانا ازيد من عندي اللي تايد الزواج من شايب
انتم مافكرتوا بعيالكم بعدين راح يتابعون تطعيماتهم ويهتمون باكلهم الصحي ويسالون عنهم في مدارسهم ووووغير كذا مافكرتو بعيالكم بنتك او ولدك اذا استعرو من ابوهم قدام الناس لانه شايب مو زي فلان وعلان يعني تبي تظلمون انفسكم كيفكم بس تضلمون عيالكم لا مو بكيفكم وزمان قالوها ولد الشيبه للخيبه بعدين مافكرتو بعيالكم اذا صارومراهقين من يبي يامرهم وينهاهم ويرغبهم ويرهبهم ان شاء الله انتي طيب المثل يقول لاكبر ولدك خاوه طيب واحد شايب عليك انتي يالام وشلون عاد للولد طيب هذا وشلون يبي يخاوي شايب كبير عاى امه من قبل يعني الفارق الثقافي كبير مره وشلون يبي يفهمون عاى بعض يبيلهم مترجم غير ان الولد اذا صار مراهق وشاف ابوه شيبه ماراح يهابه وراح يحقره هذا اذا مامد ايده عليه لاقدر الله ولعلمك حتى بكرا لاجيتى تخطبين لولدك نظره الناس لشاب امربيه شايب فيها دونيه اشوي ولوا ابتكلم من اليوم الى بكرا ماراح اخلص من سلبيات الزواج من شايب وانتم بكيفكم وكلن عقله براسه يعرف خلاصه وماحد يتحمل الا خطاه وبس |
اتزوجَ شاايب اهَون لي من شاب
يمكن بعض البنات مفتتحات صيدليات او يعملن بصيدليات ويبن يروجن بعض الآدويه الخاصه بالشيبان ولهن نسبه كل الشكر والآحترام |
اقتباس:
المشاركة الأصلية كتبت بواسطة مــعــدي الـغـنامـي http://www.gnanim.com/vb/gnanimxp/buttons/viewpost.gif اتزوجَ شاايب اهَون لي من شاب يمكن بعض البنات مفتتحات صيدليات او يعملن بصيدليات ويبن يروجن بعض الآدويه الخاصه بالشيبان ولهن نسبه الله يرزقك بشايب ويقنعك ابركته وبشرك الشيبان واجد مامن قل كل الشكر والآحترام |
اعرف تجربه مرة بها احد صديقاتي وهي زواجها من شايب يكبرها بعشرين سنة وكانت حياتها تعيسه مع الشايب الي اربع وعشرين ساعه نايم وماكان بينهم اي تواافق وتمرمطت معه وفي النهايه انفصلو،. ومن خلال تجربة صديقتي ابصم لكم بالعشرة ان الشايب عايب ومستحيل يكون فيه توافق مهما حصل يعني زواح فاشل٪
|
ابو بتال انت تغلط كثير وتقلل من قيمة الشايب والشايب البطل هو اللي يعرف
التربيه السليمه وهو اللي عنده خبره في الحياة وترى ماهو كل الشيبان فيهم خير ولا كل الشباب فيهم خير بس حبيت اقولكم ان اللي به خير ما يفرق من ترضون دينه وخلقه فزوجوه واترك المناقشه لغيري |
الزواج قسمه ونصيب مااحديعلم النصيب وين هوفيه تقبلي مروري واحترامي
|
وجهة نظري
ان البنت لما تناقش قضيه تخصها حتى مع الجنس الاخر هي ماهيب غلطانه تتكلم عن موضوع محلل شرعا ونصف الدين ولا حيا في الدين حتى وان كانت تناقش الموضوع الديني وطريقة ممارسته اجتماعيا وين الغلط؟؟ من حقها تستمع لوجهات النظر المختلفه وتقارن بينها وتستفيد منها من وين ظهرت العقد النفسيه في مجتمعنا؟؟ في العصر الذي كان الاسلام يطبق فيه تطبيق صحيح النساء ذهبن الى رسول الله صلى الله عليه وسلم يناقشن امور دينهن وكانو يسألونه فيما يمارسن من عادات اجتماعيه ومدى تطابقها مع الدين ولم يقل لهن النساء يجب ان يخجلن من طرح امور حياتهن. انا ضد الكبت والانغلاق الى متى المرأة لا تناقش كل ما يدور في مخيلتها من امور حياتيه يوميه تتعلق بحياتها ومستقبلها تحت مظلة العيب الاجتماعي هذا سبب غير مقنع العيب هو الخارج عن الشريعه فقط هو العيب والحرام ولا عيب بدون حرام ولا حرام بدون عيب لأننا مجتمع مسلم لانتبع الا الشريعه لانحرم ما احل الله ولا نحلل ما حرم الله ولا نتبع ما الفينا عليه ابأنا الأولين من خطاء لم ينزل الله به من سلطان ونحن شباب واعي مخيرين وغير مسيرين في حكم وعادات باليه لا تطابق الدين اما ما يطابق الدين فنحن معه ونضد من لا يطبقه انا اطلت في التوضيح واما الموضوع كمان اشوف ان العمر مجرد ارقام والانسان يقاس بشخصيته واخلاقه ودينه وليس بعمره اشكرك على الطرح الراقي تقديري لك.. |
بسم اللة الرحمن الرحيم
اللة يصبحكم بالخير جميعا الموضوع للنقاش والحوار وابداء الرأي وللة الحمد مافية شي يخدش الحياء -كاتبة الموضوع نقلت مايدور بين البنات من نقاشات بخصوص الزواج واكيد كلامهن بين بنات جنسهن فقط وبخصوصية تامة -ونقلت الينا مايدور في افكارهن يعني بلاش نتصور الموضوع ان فية قلة ادب او عيب --والي يقول عيب وفشلتونا رايح يجي يوم وتنخطب اختة اوبنتة وينادونها الشهود ويشوفون رايها بالخاطب موافقة والا لا شرعا لها رايها بشخص معين ومن حقها---فما بالك بموضوع عام شايب ام شاب وكلام في الخفاء ولم يذكر اسماء او قبيلة او اصل وفصل الي ادلن برأيهن--- المهم ----رفع ضغطنا بعض....---نرجع لموضوعنا --من رايي ان الي تفضل الشايب تحسبة مثل تعامل ابوها يحن عليها ويدلعها واللي تبية يجيبة اذا كان يغليها وتشوف اخوانها الشباب كيف يعاملونها -هاتي -ودي- اغسلي-سوي شاهي-ولاتخلو الامور كالعادة بين الاخوة من نشوب بعض المعارك الشرسة والاصابات الخطرة والتي دائما مايكون نصيب البنت منها كبيرا بسبب فارق البنية الجسدية للاخ ولكن يجب علية الفرار قبل قدوم الام الغاضبة لموقع المعركة ولهذا السبب تكرة الفتاة الزواج بالشباب وتمنى شايب ماتدري ان الشايب اذا كان زوج غير انة يكون أب مافية دلال وطلبات ملباة والعلوم اللي تعودتها من ابوها ذكر لي احد الاصدقاء ان شايب تزوج بفتاة وصباحيتها وهو مصبحها عقب الصلاة تسويلة قهوة وتعجن وتسوي معفوس فطورة المفضل!!! والمسكينة تبي توضح انها عروس وصباحيتها ....أآأآأآآآآ-قال قومي ياللةومن اليوم ورايح بعد الفجر والفطور جاهز-واليوم الثاني رصت عمرها ماسوت لة شي ويوم فاض من المسجد ولقاها راقدة اخذها بشوشتها لين وقفهاعلى رجلينها وصبحها صباحية(شايبو منسية)ومنين تونسين (انا وش قلت امس)وانفصع عقلها تقمز من نومها لايكون اصبحها الصبح باللة فية وحدة تبي زي كذا صباحية ولافية شهر عسل اليوم الثاني وهو عند النياق وياخذ اسبوعين وجاء -ومافية استقبال بالاحضان ولا فية رومنسية-يدنق يبيك تحبين جبهتة وخشمة بسسسس- انتبهي تضمينة لانةمايعرف هالامور وبيشيلك فوق ويرجد بك الصبة يحسبها هوشة--ومافية مولات ولابحر كل شي عندة (مالة لزوم)واذا كثرتي تلحين علية واوجعة راسة(صدقيني لو تجمعوا اطباء التجميل بالعالم ماقدرو يرممون شعر راسك الي نزعة بجلدة ولا وجهك الي راح شوربة واكيد من رعب الموقف بينفتق قلبك ----والنهاية تطررررردين القراطيس وسط المعاصير في القايلة |
نجديه مشكوره على الطرح الهادف واسف انني تاخرت عن
حذف رد احد النفسيات الي هنا ؟؟ بس ما عليك حقك علي وانا اخوك من وجهة نظري ان افضل فارق عمري بين الزوجين هو من 5 الى 7 سنوات لصالح الزوج طبعاً , اما حكاية اني باخذ لي وحده صغيره ما تدري وان الله قاطها لا والف لا , وكمان البنت تاخذ شايب تقول يدلل وعاقل ومدري ايش غلط الرجال العاقل عاقل وان كان في سن الزوجه ! والناقص ناقص حتى لو شيبه يلوح ؟ بس حلو يكون الفرق مثل ما ذكرت , واعتقد ان البنت الصغيره الي تاخذ شايب ظلمت نفسها وهو ظلمها بعد , لأن لو قدر يدللها ويراعيها ماراح تطول المده سنوات ثم هي بعز شبابها وهو طايح بالفراش الله المستعان وجهة نظري , تقبلي مروري واحترامي |
والله الموضوع شيق و وجهات النظر مختلفه وكل انسان حكى تجربته شي طيب
انا وجهة نظري اذا كان فيه رضا وقبول وين المشكله لما البنت تتزوج شاب او شايب وكمان نقطه مهمه لما الشاب يتزوج اكبر منه انا من وجهة نظري حاجه مافيها اي اشكال واسمها نصيب واتمنى اني شاركت برأي مفيد وشكر عميق لصاحبه الموضوع الله يوفقك |
نجديه الله يسعد صباحك
الموضوع جميل ويستحق النقاش فعلآ فارق السن بين الزوجين قضيه اجتماعيه تستحق البحث وطرحها على طاولة النقاش الأخوه الذين مرو علقو كلآ بما يراه صواب وليست كل وجهات النظر صائبه وأولها وجهة نظري الفتاه يبداء التغير الفيسلوجي لديها برسم صورة فتى احلامها وتعكف على رسم تلك الصوره وتنقحها حتى تصبح في اجمل صوره وطبعآ سيكون تلك الصوره لشاب يقاربها في العمر وتظل تتطلع لتلك الصوره في حياتها الواقعيه وعندما نتدخل ونضعها امام صوره غير تلك الصوره التي رسمتها فأننا نسلب منها ذلك الحق رغم ان هناك اشخاص متقدمين في السن لديهم ثقافه ووعي ويستطيعون ان يلبو متطلبات الفتاه ويستطيعون مجاراتها العمريه ولاكن كل ذلك لن يصل الى مجارات متطلباتها العمريه واقعيآ فلكل عمر تطلعاته ورغباته لدي الفتاه الرجل عندما يتقدم به العمر تتقلص لديه الرمانسيه وتقل اهميتها لديه ويصبح يفكر بعقلانيه اكثرويرى ان هناك ماهو اهم منها بينما الفتاه تراها من الضروريات ومن هنا تبدا المفارقه الكثير والكثير من الفوارق العمريه تحول دون ان أؤيد زواج الشابه ممن يكبرها على الأقل بفارق عشرون سنه هذه وجهة نظري ويمكن ان تكون كما اسلفت خاطئه تحياتي للجميع |
الآخت نجديه شكراً لك على الموضوع
اقتباس:
كل التقدير يابطل |
هههههههههههههههههه
بكيفها خلولها الحريه يمكن ماهويتن العود هههههههههههههههه موضوع شيق لاتعليق وفو الزملاء بتعليقاتهم الجميله احترامي لطارح الموضوع |
تراني شايب وعلى رقم باكستاني
هههههههههههههههههه شكرا لطرحك |
أتــــــــــــــــــــــــفق مع الاخ العزيز ابو رامي ماقصــــــــــــــــــــر يعطيه الف عافيه...
والف الف شكر لك يا أختي الغالية نجـــــــــــــــديه.. |
وعليكم السلام ورحمة الله وبركاته
أولاً ربمّما أن الموضوع قد أخذ حقّه الكافي من النقاش , ولكن عندما تصفحت الموضوع شدّني وأردت أن اُزجي بوجهة نظري ضمن وجهات النظر المدونه ... مسألة الفارق العمري بين الزوجين مسألة لها أبعاد كثيرة .. فلعلي أبدأ بهذا الحديث الشريف لإعطاء صورة شامله في بداية المداخلة .. يقول النبي صلى الله عليه وسلّم : [ زوّجوا من ترضون دينه وخُلُقه ] .. أو كما في الحديث ! ولم يتطّرق الحديث ولا الأحاديث الأخرى للفارق العُمري في الزواج .. ولكن كما أوضح الأستاذ أبو رامي في مداخلته [ التركيبه الفيسيولوجيّه ] لدى المرأه والعُرف البشري يُرجّح الزواج من الفئة العمرية المتناسقه بين الطرفين , وهي في الغالب أن يكُر الزوج عن الزوجه بـ خمس سنوات فما دون .. وهذه هي ماجرت عليه العادة في معظم المجتمعات ... - همسه : معظم الزيجات التي تتم بفارق كبير بين الزوج والزوجة من حيث العمر كما أسلفت أحدى الأخوات في مداخلتها هي تلك التي تُبنى على ثروه أو ورث بالعامية [ داخله على طمع ] !! ولا أعتقد أن هناك فتاه تفضل الزواج من ( شائب ) الا لأسباب معيّنه .. أعتذر على الإطالة وأسجل إعجابي بالموضوع والمداخلات كافة ! دمتم بودّ ياسر العضيّاني |
| +4. الساعة الآن 12:46 AM. |
Powered by vBulletin® Version 3.8.12 by vBS
Copyright ©2000 - 2025, vBulletin Solutions Inc.
جميع مايطرح في المنتدى لا يعبر بالضرورة عن رأي إدارة شبكة قبيلة الغنانيم الرسمية وإنما يعبر عن وجهة نظر كاتبه فقط